Dhundh ki parat itni moti thi ki lagta tha saari dharti vashpikrit hokar baadal ban gayi hai. Fir bhi masti me baul gaate huye naavik apna chappu chalaye jaa raha tha.
"Ye lo Dada," dhandh ke kaaran naavik ka chehra spashtata se dikh to nahi raha tha par uski aawaz me hansi tair rahi thi, "Aa gaya kinaara."
"Kon sa gaanv hai ye?" Ek durbal se dikhne vale yuvak ne naavik se poocha. Dekhkar to use aisa lagta tha jaise saalon se usne nahaaya na ho. Na hi uske baalon me kanghi ki hui thi aur dadhi ke baal betarteebi se badhe huye the. Magar Naavik ko naav se utarne ke liye uske ladkhadate huye kadmo ko sahara dene me koi hichak nahi hui.
"Kamaal karte ho dada aap bhi," Naavik hanskar bola, aap hi ne to bola tha nadi ke dooje kinare chhor do."
Jaise hi vo yuvak kinaare par khada hua aur usne apne kapdon ki jebein khangaali magar vo khaali thi. Us yuvak ne apni Mehengi ghadi utaari aur Naavik ko ghade dete huye kaha, "Paise to nahi hain mere paas, ye ghadi acche daamo me bik jaayegi."
Naavik haath jodte huye bola, "Kya baat karte ho Dada. Aap jaise saahsi maanush se main kiraaya loonga? Kaale paani se choote har kaidi ko ye maajhi har Nadi bina paisa liye paar karayega."
"Tumhe kaise..." Vo yuvak chaunka.
"Mere majhle dada ka shareer jab hame Kai arjiyaan lagaane ke baad Gori sarkar se mila, to unke daahine haath me bhi vahi thappa tha jo aapke haath me hai."
"Bhagya accha tha tumhare dada ka," vo yuvak bola, "jo samay rehte mrityu ho gayi aur uski deh ka antim sanskar bhi ho gaya. varna ye Saubhagya ham kaale paani vaasiyon ke paas kahaan?"
"Accha Dada, Nomashkar," Kehkar Naavik fir geet gaate huye doosre paar ki or badh chala.
Tabhi us yuvak ko ek akriti dhundh me nadi ki or jaati huyi dikhi.
"Are ruko," Vo yuvak chillaya, "Nadi ki dhaar bahut tez hai."
Yuvak us aakriti ki or bhaaga par tabhi nadi me ek chhapak ki aawaz aayi. Vo yuvak bhi uske peeche nadi me kooda par koi dikha nahi.
Nadi me aadhe ghante tak dhoondhne ke baad bhi jab koi nahi dikha, to vo paani se baahar aa gaya. Aakhir fir apne veham ke kaaran moorkh kaise ban sakta hai vo? Kaale paani ke andar Jo bhi jaata hai aur jo vahaan se lautta h vo dono kabhi ek nahi hote. Vo badal chuka tha aur ab uske liye jeevit- mare huye logon ko dekhne ka veham hona ek saamanya baat thi.
Langdate huye aur geele shareer ke kaaran kaampte huye jaane vo kahaan chala Jaa Raha tha, ki ant me shareer ne uska saath chhor diya. Aur sach poocho to apni aankon ko sada ke liye moond Lena sabse sundar ehsaas tha uske liye.
"Malhar Babu," Ah! Kisi ko swayam ko is naam se pukaarna to mrityu ke baad hi sambhav ho sakta tha. Varna picchle das saalon me to uska ek hi naam tha- Kaidi no. 279. Magar ye aawaz to uski student ki thi. To kya vo bhi mar gayi thi?
Na chahte huye bhi Malhar ne aankhein kholi, uska shareer ek mehenge shawl se Dhaka hua tha. Uske saamne ek geheno se Ladi ladki Banaarsi sari me khadi thi.
"Kiran zara babumoshay ko mere sang sahaara to Dena," Kalyani ne apne peeche khadi ek mahila se kaha.
"Ji thakurain!"
Thakurain? Magar Kalyani to college ki padhai kar rahi thi na? Nahi, vo to das saal pehle ki baat thi Jab das saal tak uske khud ke ghar me kya hua use ye tak pata nahi chala, to Kalyani ke byaah ke baare me kaise pata chalta. Magar Kalyani ki maang par koi sindoor to tha nahi. Pata nahi har baar Malhar ye galatfehmi kyon paal leta tha jaise uske na rehne se sansaar hi ruk gaya hoga. pichhle das saalon me kucch nahi ruka, aur ab jab vo saare sansaar ke liye mar chuka hai to kucch mahino baad jab vo hamesha ke liye is sansaar se vidaa le lega to kisi ko to pata hi nahi chalega ki vo bhi kabhi tha is sansaar me.
So with this FF, I've returned to past timeline stories after so long. So please let me know of your feedback and whether I should leave this story here or expand it more.
Zara, I know you used to like my past timeline stories. So hope this one fulfils your expectation to some extent.
Bade Achche Lagte Hain Naya Season
