Shayri ( My Collection) - Page 3

Kal Rat Bazm Main Jo Mila Gulbadan Sa Tha
Khushboo Se Uskay Lafz Thay Chehra Chaman Sa Tha
Dekha Usay To Bol Paray Uskay Khad-O-Khal
Poocha Usay To Chup Sa Raha, Kam Sukhan Sa Tha
Tanhaiyo'n Ki Rutt Main Bhi Lagta Tha Mutmae'n
Wo Shakhs Apnay Ap Main Ek Anjuman Sa Tha
Socha Usay To Mai Kayi Rango'n Main Kho Gaya
Alam Tamam Uskay Haseen Peyrahan Sa Tha
Jo Shaakh, Shaakh Thi Wo Usi Ke Labo'n Se Thi
Jo Phool Khil Gaya Tha Wo Usi Ke Dehan Sa Tha
Wo Saadgi Pehen Ke Bhi Dil Main Utar Gaya
Uski Har Ek Ada Main Ajab Bholapan Sa Tha
Asaan Samjh Rahay Thay Usay Shehr-E-Jan Ke Log
Mushkil Tha Is Qadar Ke Meray Apnay Fun Sa Tha
Wo Guftgu Thi Uski, Usi Ke Liye Hi Thi
Kehnay Ko Yun To Main Bhi Shareek-E-Sukhan Sa Tha
Taray Thay Chandni Main Ke Tohmat Ke Daagh Thay
'Mohsin' Kal Aasman Bhi Meray Kafan Sa Tha...!!!

Kab Talak Shab Ke Andheray Main Sehar Ko Tarsay
Wo Musafir Jo Bharay Shehr Main Ghar Ko Tarsay
Aankh Thehray Hue Paani Se Bhi Katraati Hai
Dil Wo Rehru Ke Samandar Ke Safar Ko Tarsay
Mujhko Us Qehat Ke Mausam Se Bacha Rab-E-Sukhan
Jab Koi Ehl-E-Hunar, Arz-E-Hunar Ko Tarsay
Ab Ke Is Taur Musallat Hua Andhera Har Suu
Hijr Ki Raat Meray Deeda-E-Tar Ko Tarsay
Umr Itni To Ata Kar Meray Fun Ko Khaaliq
Mera Dushman Meray Marnay Ki Khabar Ko Tarsay
Usko Paa Kar Bhi Usay Dhoond Rahi Hain Ankhein
Jaisay Pani Main Koi Seep Gohar Ko Tarsay
Na Shanasayi Ke Mausam Ka Asar To Dekho
Aaiina Khaal-O-Khadd-E-Aaiinagar Ko Tarsay
Ek Duniya Hai Ke Basti Hai Teri Ankho'n Main
Wo To Hum Thay Jo Teri Ek Nazar Ko Tarsay
Shor-E-Sursar Main Jo Sar Sabz Rahi Hai 'Mohsin'
Mausam-E-Gul Main Wohi Shakh Samar Ko Tarsay...!!!

Bahut Khamosh Reh Kar Jo Sazayein Mujhko Deta Tha
Baray Khamosh Lehjay Main Sadayein Mujhko Deta Tha
Kabhi Jo Dard Ki Aatish Mujhay Sulganay Lagti Thi
Wo Apni Saans Ki Mehki Hawayein Mujhko Deta Tha
Usay Main Ajnabi Samjha Magar Har Morr Par 'Mohsin'
Wo Apnay Nam Ki Sari Duayein Mujhko Deta Tha...!!!

Main Kyun Na Tark-E-Talluq Ki Ibteda Karta
Wo Door Dais Ka Baasi Tha Kya Wafa Karta
Wo Meray Zabt Ka Andaza Karnay Aaya Tha
Main Hans Ke Zakhm Na Khata To Aur Kya Karta
Hazaar Aainay Khano'n Main Bhi Na Paa Saka
Wo Aaina Jo Mujhay Khud Se Aashna Karta
Dar-E-Qafas Pe Qayamat Ka Habs Tha Warna
Saba Se Zikr Tera Main Bhi Sun Liya Karta
Meri Zameen Tu Agar Mujhko Raas Aa Jati
Main Rifaton Main Tujhay Aasman Sa Karta
Gham-E-Jahan Ki Mohabbat Lubha Rahi Thi Mujhay
Main Kis Tarha Teri Chahat Pe Aasra Karta
Agar Zuban Na Kat'ti To Shehr Main 'Mohsin'
Main Patthro'n Ko Bhi Ek Roz Hamnawa Karta...!!!