problem

Raj ki neend hi nahi khul rahi thi,raat bhar so nahi paaya hai woh,aaj court me koi hearing bhi nahi hai,woh bistar me leta tha.Mahant se mile hue kareeb dus din guzar gaye hain, mann hi mann Mahant ki kahi hui baatein Raj khud se kehta aaya hai,par matlab nahi samajh paa raha hai..aisa kyon kaha Mahantjee ne?Aur,Kranti k baare me bhi kaha..k woh bhi Raj se..Raj ko toh aisa nahi lagta..ajeeb ladki hai,is duniya me hokar bhi is duniya ka hissa nahi hai.Kyaa kare Rajveer?Aur usse jaa kar kyaa kahe?Bachpan k dost se rishta jodne me agar inkaar kar sakti hai..toh Rajveer toh ekdum hi anjaan hai Kranti k lia. Sohan Singh ne us ladke ki pairvi ki..Rajveer ki pairvi kaun karega?Aur Kranti apni marzi ki maalkin hai..us par zor daal kar kuchh nahi karavaya jaa sakta hai.Rajveer aisa karna chaahta bhi nahi.Kranti khud kyaa chaahti hai..yeh bhi Rajveer nahi jaanta.Par Raj ko aisa lagta hai k Kranti kuchh toh sochti hogi uske baare me..jis tarha woh baat karti hai Rajveer se..uske dil me koi toh jazbaat hai..jisse shaayad khud Kranti anjaan hai..

"Kyon?Kyaa hua?Tum toh kabhi aise nahi the Rajveer?Achanak se kyaa hua tumko?Case par concentrate karo..kyon us ladki k peechhe bhaag rahe ho?"

"Woh..ladki..samajh k baahar hai.."

"Haan..toh samajhne ki koshish mat karo..uske peechhe mat jaao.."

"Buajee se kyaa kahoonga?"

"Woh sathiya gayi hain..unko lagta hai shaadi k baad Kranti ghar par shaanti se baithegi, par aisa hoga nahi..tumhari zindagi barbad kar k rakh degi..Buajee k baaton me aa kar uske peechhe mat jaao Raj."

"Main Buajee k kahne se nahi milta usse..jis din se usko dekha hai..ussi din se usse dobara milne ki koshish karta rehta hoon.."

"Kyon?Aur koi kaam nahi hai?Court ka kaam kar k agar waqt bachta hai toh Baojee k karobar par dhyaan do..us nakhchadhi k peechhe waqt kyon barbad karte ho?Uske saath uljho mat..zindagi barbad kar degi woh.."

"Nahi..aisa nahi karegi.."

"Arre..uska Tau hai jail me..Krantikari..woh khud Krantikarion ki madad karti hai..tumhara usse meljol ..kuchh bhi ho sakta hai tumhare saath..Baojee ki Rai Bahaduri toh jaayegi hi.. upar se tumhara future bhi gaya samjho.."

"Nahi..Mahantjee ne kaha hai.."

"Arre us Mahant ko koi kaam nahi hai..achha khasa admi.Biwi mar gayi..bas ,usne sannyas lia..aur tumko ulti seedhi patti padha raha hai..aur tum ussi baat ko le kar uchhal rahe ho.. khud ko dekho..kyaa the tum..aur kyaa ho gaye ho in kai dino me..tum kab se in Mahant aur Sadhu jaise logon par yakeen karne lage?Itne kumzor toh kabhi nahi the tum..aur kyon baar baar Kranti k paas jaate ho..tumko samajhme nahi aati k woh tumko tabaahi ki taraf le jaa rahi hai?"

"Nahi...Kranti waisi nahi hai.."

"Aur uski zindagi me woh jo ladka hai..uske baare me kyaa kahoge?"

"Woh dost hai uska.."

"Mard aur aurat ki dosti?Kabhi hui hai?Aakhir kaar aag aur ghee jaise hote hain..dosti kab pyaar me badal jaaye..pata nahi chalta.."

"Nahi...aisa nahi hai..."

"Tum kaise keh sakte ho?"

"Main jaanta hoon..."

Raj k andar ek jungh chal rahi hai..Raj khud se ladh raha hai..khud se ladh kar kaun jeet paaya hai aaj tak?Koi nahi..Kranti ka wajood dheere dheere Raj k wajood par haavi ho raha hai.Kranti ka khayaal jaise koi ajgar hai..ahista ahista Raj ko nigal raha hai..Raj kho raha hai..aur is tarha kho jaana Raj ko bura nahi lag raha hai.Par,iska anjaam kyaa hoga?Kabhi kisi ne socha hai?Kya Raj ne socha tha Kranti se pyaar karne se pahle?Aur itni bechaini bhi dil me hai aaj kal.. Raj ki zindagi k panno par dil ki kalam chal chuki hai.. ehsaas k rang aur soorkh ho rahe hain,seene me ek kaanta sa choobha hai,ajeeb si ghutan hai..ajeeb si kashmakash hai..aisa kyon hua?

"Kaake..oo Kaake..kyaa hua?Neend me kisse baatein kar raha hai?Dekh toh..sooraj sar par chadh aaya..aur tu abhi tak bistar me hai?Uth jaa Kaake.." Buajee ne Raj ka haath pakad kar khincha..Raj ek jahtke se uth gaya...Buajee ne Raj ko dekha..kaha ,"Arre..tabiyat toh theek hai na teri?Dekh toh..chehra pura paseena paseena ho gaya hai..kyaa hua?Koi bura khwaab dekha kya?"

Raj--Nahi Buajee..woh zaroori case k baare me soch raha tha..aaj kal thoda pareshaan hoon ussi case ko lekar..

Bua--Ohh..par aisa bhi kaunsa case..dekh Kaake..din bhar court kachhehri k baare me mat socha kar..aur tu kaisa insaan hai?Tere dost ki shaadi hai kuchh hi dino me..aur tu kamre me baitha hai..arre uske ghar jaa..haath bata uska..Sanjay humara bhi Beta lagta hai Kaake..

Raj--Jee Buajee..

Bua--Arre..main toh bolna hi bhool gayi..main abhi abhi mandir se aa rahi hoon..aur pata hai mujhe kaun mili thi?

Raj--Kaun?

Bua--Kranti...

Raj--Ohh..aaj fir kuchh keh dia usne?

Bua--Nahi,usdin k bartav k lia maafi maang rahi thi..yeh ladki bhi na..khamokha pareshaan hoti hai..log uski shaadi ki baat kyon kar rahe hain..toh usko gussa aa raha hai..

Raj--Achha..Buajee..mard aur aurat me dosti hoti hai?

Bua--Kyaa?

Raj--Main poochhna chaahta tha k mard aur aurat me dosti kaisi hoti hai..matlab..dosti pyaar me badal jaaye..aisa hota hai na?

Bua--Aisa zaroori nahi hai..yeh har kisi k maamle me nahi hota..

Raj--Agar ladka pyaar kare..aur ladki ki taraf se kuchh naa ho..tab?

Bua--Tab kyaa..?Kuchh bhi nahi..par tu yeh sab kyon poochh raha hai?Teri kisi ladki se dosti hui hai kya?Bhai..waqt badal raha hai..kuchh bhi ho sakta hai..bata..kyaa hua?

Raj--Aapne kabhi kisi se pyaar kia hai?

Bua--Haan..tere Foofajee se kia tha..main chaudha saal ki thi jab unse meri shaadi hui thi..unhi se pyaar kia..tere Foofajee tab unnees saal k the..

Raj--Foofajee k jaane k baad..Baojee ne aapki doosri shaadi k baare me nahi socha?

Bua--Haan..mere Sasooral me hi bahut log the,jo mujh par chaadar daalna chaahte the.. par mera mann nahi maana..tere Foofajee se bahut pyaar jo tha..aaj bhi pyaar hai unse., chal chhod...tujhse poochhna tha k kya main aur teri Chaijee jaaye?Kranti k Mama-Mami k paas?Uska haath maangne..?

Raj--Kranti..raazi hogi?

Bua--Tu raazi hai?Hai toh bata..baaki mujh par chhod de..

Raj--Jaisa aaplog theek samjhe..main kyaa boloon?

Bua--Haan..mann me toh laddoo foot hi rahe hain...

Raj--Buajee..main..yeh jaldbaazi nahi hai?

Bua--Nahi.Ab tu muh bandh rakh..main chali..bahut kaam hai..

************************************

Hazaron khwaishen aisi k har khwaish pe dum nikle..

Bahut nikle mere armaan lekin fir bhi kum nikle..

Mohabbat me nahi hai fark jeene aur marne ka..

ussi ko dekh kar jeete hain jis kaafir pe dum nikle..

Hazaron khwaishen aisi k har khwaish pe dum nikle..

Bahut nikle mere armaan lekin fir bhi kum nikle..

Mirza Ghalibh k is sher ko Kranti padh rahi thi..Nirmal k kahne par..Nirmal ko is sher ko samajhna hai..taa k woh Sanjay ko bata sake..aur Sanjay impress ho jaaye..ab itni gehrai se Nirmal soch nahi paati jis tarha Kranti soch sakti hai..issi lia Nirmal ko Kranti ka sahara lena pada..

"Dil me bahut si khwaishen jaagti hain..har pal ek nayi hasrat paida hoti hai is dil me..ab khwaishen badhengi toh dil par bojh bhi badhta jaayega..is bojh k tale dab kar kahi naa kahi insaan ka dum ghootne lagta hai..par fir bhi dil k armaan kum nahi hote..aur mohabbat..jo jeene ki wajah ban jaati hai..wahi kabhi kabhi marne par majboor kar deti hai..par fir bhi ussi maut k dum par yeh zindagi chalti hai..pal pal ka jeena aur marna..har pal k jeene me marna..aur har pal k marne me jeena..issi ko mohabbat kahte hain.."

Nirmal--Kranti..zara aasaan kar k bata..dekh..tu hai Literature me maahir...main toh nahi..Sanjay jhatke me pakad lenge mujhe..

Kranti--Tujhe yeh karne ki zaroorat nahi..tu aise hi unko pasand hai..

Nirmal--Fir bhi..thoda impression ban jaaye toh kyaa bura hai..

Kranti--Haan..yehi bhi hai..ek baat hai..maine faisla kia hai..

Nirmal--Kaisa faisla?

Kranti--Teri shaadi ho jaaye..uske baad main Amritsar chali jaaoongi..yehan nahi rehna mujhe..

Nirmal--Shubhankar k paas jaayegi?

Kranti--Nahi..main apne ghar lautoongi..jo barson pahle chhoot gaya tha..Shubhankar meri manzeel nahi..mera ghar hi meri manzeel hai..

Nirmal--Sun...aaj dopaher k teen baje mujhe Sanjay se milna hai..shaadi se pahle aakhri baar mil rahe hain..tu chalna mere saath..varna Maa mujhe akeli jaane nahi dengi..

Kranti--Lovely ko le kar jaa..

Nirmal--Main Maa ko hi le jaati hoon..kyon?Lovely yaa Maa..kyaa fark hai?Tu bhi naa.. chalna..iske baad toh shaadi ho jaayegi..

Kranti--Main jaa sakti hoon..par Jeejajee apne us dost ko saath le kar aa jaayenge..tu toh baat karne lagegi..main akeli unke saamne pad jaaoongi..

Nirmal--Tu Rajveer ki baat kar rahi hai?

Kranti--Haan..

Nirmal--Toh kyaa hua..baat karna usse..khaa jaayega tujhe?

Kranti--Tu nahi samajhti..

Nirmal--Baad me samajh loongi..tune pahle yeh jo matlab mujhe batayi hai..ek kaagaz me likh kar de..wahan jaa kar bhool gayi toh..jaldi likh..sher bhi likh ..aur matlab bhi..

***************************************

"Kranti..tumhara chehra itna utra hua kyon lag raha hai?"

Sanjay k is sawal se Kranti cheedh gayi..bina Rajveer k yeh admi kahi jaa nahi sakta?Aur yeh Rajveer usse ghoor raha hai,uski nazron me kuchh aisi baat hai,jo Kranti ko pareshaan kar rahi hai,jis din se Rajveer se jhamela hua hai us din k baad aaj mulakat hui hai.. Rajveer jaise jaanta hi tha k Nirmal k saath Kranti hi aayegi..Rajveer ki aankhon me ajeeb si shararat hai..

Kranti ne kaha ,"Didi..jab baat khatam ho jaaye..toh mujhe awaz dena.Main us pedh k paas baithi hoon..

Nirmal--Haan..

Kranti chali gayi..Rajveer Sanjay aur Nirmal k saamne khada raha..Nirmal ko ajeeb lag raha tha..achanak se Nirmal ne apna bag khola..aur meethai ka dabba dia Sanjay k haath me..kaha ,"Maine banai hai.."

Raj--Main bhi hoon..mujhe mil sakti hai meethai?

Nirmal--Haan..lijiye...

Ek kagaz meethai k dabbe k saath neeche geer gaya..Sanjay ne usse utha lia..poochha, "Arre Nirmal..Ghalibh ki shayeri..meethai k dabbe k saath?Dekhoon toh..arre baap re.. Nirmal..tumne likhi hai yeh sab?"

Nirmal--Nahi..Kranti ne likh kar dia hai..maine hi baar baar usko pareshaan kia yeh sab likhne k lia..sher aur uska matlab bhi..

Sanjay--Yeh sher-o-shayeri mere palle nahi padti..mujhe impress karne k lia meethai ka dabba hi kaafi hai..thanks..achhi bani hai..kyon Raj?

Raj--Haan..tum log baatein karo..main zara ghoom kar aata hoon..arre meri shoe less dheeli pad gayi..

Raj neeche jhoonka shoe less theek karne k bahane..aur jo kagaz Sanjay ne feka tha usko utha lia..jisme Kranti ne Ghalibh ki shayeri aur uska matlab likhi hai..

*******************************************

"Dil me bahut si khwaishen jaagti hain..har pal ek nayi hasrat paida hoti hai is dil me..ab khwaishen badhengi toh dil par bojh bhi badhta jaayega..is bojh k tale dab kar kahi naa kahi insaan ka dum ghootne lagta hai..par fir bhi dil k armaan kum nahi hote..aur mohabbat..jo jeene ki wajah ban jaati hai..wahi kabhi kabhi marne par majboor kar deti hai..par fir bhi ussi maut k dum par yeh zindagi chalti hai..pal pal ka jeena aur marna..har pal k jeene me marna..aur har pal k marne me jeena..issi ko mohabbat kahte hain.."

Kranti apne hi soch me magan thi..usne yeh sab baatein suni jo usne kagaz par likh kar Nirmal ko di thi..par Raj ki awaz hai yeh..Kranti ne Raj ki taraf dekha..Raj ne kaha ,"Us din aap is tarha chali gayi..mujhe samjhane ka mauka nahi mila.."

Kranti ne jawab nahi dia..Raj Kranti k saamne khada ho gaya..kaha ,"Tahelna ,shaam k waqt tahelna..sehat k lia achha hai..aaiye..".Kranti Raj k saath tahelne lagi..

Raj--Kuchh hi din bache hain..Sanjay ki shaadi ko..

Kranti--Haan..uske baad main Amritsar chali jaaoongi..

Raj--Kyaa?

Kranti--Haan...mere apne ghar..Amritsar hi mera ghar hai..

Raj--Waha par toh koi nahi hai aapka..

Kranti--Ghar toh hai na..bhale hi koi naa ho..

Raj--Woh ladka..jisko aapke Taujee ne choona hai..woh wahi par hai na?

Kranti--Uska hona naa hona ..mere lia koi maaine nahi rakhta..Amritsar me humesha k lia nahi rahega woh..usse mera koi lena dena nahi hai..

Raj--Itne din ki dosti k baad aap aisa keh rahi hai?

Kranti--Mujhe aisa kyon lag raha hai k agar main usse shaadi kar loon..toh aapko bahut khushi hogi..?

Raj--Main aapki baat kar raha hoon..

Kranti--Mat kijiye..

Raj--Arre..kyaa hua..?Achanak dimaag garam ho gaya aapka?Waise...us ladke ka naam jaan sakta hoon?

Kranti--Shubhankar..Shubhankar Sharma.

Raj--Aap se woh pyaar karte hain?

Kranti--Mujhe kyaa maloom..?

Raj--Aap unse pyaar karti hain?

Kranti--Faisla kijiye..main yehan se jaaoon..yaa aap jaayenge..bakwas bahut kar li aapne..

Raj--Okay..I am sorry..par aap Amritsar kyon jaana chaahti hain?

Kranti--Arre..purkhon ka ghar hai..uski dekhbhaal karni hai..

Raj--Lahore se Amritsar zyada door nahi..kabhi kabhar chali jaana..iske lia Lahore chhod kar jaane ki koi zaroorat nahi aapko..maan lijiye..Lahore me hi aapki shaadi ho gayi..tab?Aapka ghar agar Lahore me hi bas gaya..tab kyaa karengi aap?

Kranti--Mera ghar Lahore me nahi basega..Amritsar hi mera ghar hai..aisa mera dil kehta hai..

Raj--Kyaa?

Kranti--Haan..mera dil baar baar kehta hai..main bahut jald Amritsar jaaoongi..humesha k lia..mera ghar Amritsar me hi basega..mujhe apne ghar jaana hi hoga..jo ghar mujhse chhoot gaya hai..mujhe jaana hoga..

Raj--Aapke apne log yehi par hai..Amirtsar me koi hai bhi toh nahi..

Kranti--Mera ghar hai..

Raj--Ek din aap hi ne kaha tha..k desh zameen ka tookda nahi..desh deshvaasion se banta hai..ussi tarha ghar sirf chaar deewaron darwaazon se nahi banta..gharwalon se banta hai..pyaar se banta hai..tanhai ki buniyad par ghar nahi banta..

Kranti--Meri kismat mujhe le jaayegi ..Amritsar..main jaanti hoon..aisa mera dil kehta hai..

Raj--Aapka dil kabhi kuchh achha soch sakta hai?Yaa humseha aisi ulti seedhi baatein hi chalti hai iske andar?

Kranti is baat ka jawab dene hi jaa rahi thi k Sanjay ki awaz aai.."RAAAAAAAJJJ..CHAL.. DEEEEEERRRRRR HOOO GAYI.."

Rajveer jeep ki taraf jaane laga..achanak Kranti ne kaha .."Aaj kal aap bahut badi uljhan me hai..hai na?"

Raj chauk gaya..bola ,"Aapko kaise pata?"..Jawab me Kranti ne muskura kar kaha ,"Pata chal jaata hai...aapke dil aur dimaag ki jaddo jahed..aapki aankho se saaf pata chal raha hai.."

*******************************************************

Raj ghar laut kar Buajee k paas gaya..kaha ,"Jo karna hai jaldi kijiye....Sanjay ki shaadi hote hi woh Amritsar chali jaayegi..us tak pahoochna mushkil hoga..".Ussi raat Buajee ne Chaijee se keh dia,"Kaake k lia uski laayak ladki mil gayi hai..ussise Kaake ki shaadi karani hai..Sanjay ki shaadi k pahle hi rishtey ki baat chalaani hai..dono shaadian ek hi mandap se ho jaaye toh bahut achha hoga."

Kranti Raj ki aankho me dekh sakti hai..yeh khabar nayi hai Raj k lia..Raj khud se ladh raha hai..yeh baat Kranti samajhti hai..jo itna samajhti hai..kya woh Raj k pyaar ko nahi samajhti?Zaroor samajhti hai..