Woh Yaqeen Ka Ek Naya Safar (Novel)

Herein lies the much awaited translation of the novel "Woh Yakeen Ka Ek Naya Safar." It's written by "Farhat Ishtiaq" and the popular new drama "Yakeen Ka Safar" is loosely based on it.

Disclaimer: I do not own the novel or the drama. I was given permission by "Farhat Ishtiaq" to translate the novel in Roman Urdu. I am not getting paid to do this so please bear with any mistakes or typos.


Installment 1:
http://www.india-forums.com/forum_posts.asp?TID=4901852&PID=144184619&#p144184619
http://www.india-forums.com/forum_posts.asp?TID=4901852&PID=144184687&#p144184687

Installment 2:
http://www.india-forums.com/forum_posts.asp?TID=4901852&PID=144196872&#p144196872

Installment 3:
http://www.india-forums.com/forum_posts.asp?TID=4901852&PID=144207957&#p144207957

Installment 4:
http://www.india-forums.com/forum_posts.asp?TID=4901852&PID=144231668&#p144231668

Installment 5:
http://www.india-forums.com/forum_posts.asp?TID=4901852&TPN=5

Installment 6:
http://www.india-forums.com/forum_posts.asp?TID=4901852&PID=144310916&#p144310916

Installment 7:
http://www.india-forums.com/forum_posts.asp?TID=4901852&PID=144420650&#p144420650

Installment 8:
http://www.india-forums.com/forum_posts.asp?TID=4901852&PID=144443811&#p144443811

Woh Yaqeen Ka Aik Naya Safar

By: Farhat Ishtiaq

Installment 1:

"Doctor Zubiya Khalil! Aap yahan par job kyon karna chahti hain?

Pichhle ek ghante se musalsal khamosh baithe iss be panah ba-roob shakhsiyat ke malik bande ne achanak sawal kiya tha. Interview board mai baithe teen afraad mai se musalsal do hi afraad is se sawal kar rahe the. Iss ne choonk kar wazahat talab nazroon se iss ki janib dekha tha.

"Mera kehne ke matlab ye hai ke akhir aisi kiya wajah hai jo aap Peshawar chhod kar iss door aftaad basti mai job karna chahti hain? Iss ne khud hi apni baat ki wazahat kar di thi.

Ye isski zindagi ka pehla interview nahi tha. Woh iss se pehle be shumar jaghon par interview de chuki thi. Mulazimat karna bhi naya tajurba nahi tha. Magar yahan apne bilkul samne iss wasee o areez maiz ke peeche baithe iss bande mai pata nahi aisi kiya baat thi ke woh thori si nervous ho gayi thi. Halake woh iss qisam ke sawal ke liye khud ko tayar kar ke ayi thi, magar iss waqt maloon nahi kyon isse aisa lag raha tha jaise woh iss se jhoot nahi bol paye gi. Woh apni zaheen ankhon se na sirf ye ke jhoot pakar le ga balke shayad sari sachayi bhi jaan jaye. Iss ne la shaori toor pe mathe pe aya pasina saaf kiya tha.

"Iss liye ke apke ad mai diya howa salary package aur deegar maraat mere liye attractive theen. Mai house job ke baad se pichhle ek saal ke dooran government job hasil karne ke liye khasi kooshishain kar chuki, jin mai siwaye na kaami ke kuch hasil nahi howa. Agar private job hi karni hai tu aisi jagah kyon na karon jahan meri mehnat ka behtar moa'fza mil raha ho.

Ghar se sooch ke aye howe insaan dosti, khidmat, khalq-e-watan ki khidmat aur dukhi insaniyat ka dard qisam ke alfaaz isse yaksar bhool gaye the. Jhoot tu khair iss ne abhi bhi bola tha, magar ghar se sooch ke ayi howi dhuwaan darr taqreer woh behar haal nahi kar payi thi. Iss ke chehre pe apni baat kar rud-e-amal dekhna chaha tu siwayee sapat chehre ke kuch nazar na aya. Ye yaqeenan interview ka akhri sawal tha, kyonke iss sawal ka jawab dete hi isse janne ki ijazat mil gayi thi. Bila-shubba ye isski zindagi ka sab se taweel interview tha.

Dayeen taraf bethi khatoon doctor se haath mila ke baqiya dono hazrat ko khuda hafiz kehti bag kandhe pe daal ke woh kamre se nikal ayi thi.

Interview ke dooran khatoon ne bhi aur dosre doctor sahib ne bhi baat cheet ke saath saath file mai lagi iss ki asnaad ka ba-ghor jaiza liya tha. Magar woh ajeeb admi tha iss ne na tu file ko haath lagaya tha aur na hi koi paishawarana sawal kiya tha. Hala'nke who dono musalsal iss se mukhtalif paishawarana o'moor pe sawal jawab karte rahe.

"Kitna ajeeb sa tha woh banda. Ba'zahir youn lag raha tha jaise kaheen khoya howa hai. Lekin aisa tha nahi. Ghar anne ke baad bhi woh kafi dayr tak waheen ke barre mai soochti rahi thi. "Woh puri tarah wahan moojod tha aur mere har har andaz aur jumle ko toul raha tha. Andaza laga raha tha ke mai kitne pani mai hon. Mujhe apne paishe se muta'liq kitni maloomat hain. Isse kaghzoon mai likhi division aur degrees mai koi dilchaspi nahi thi. Woh mere andar moojod har achhayi, har burayi, har khoobi, aur har khaami ko khooj raha tha.

"Kaisa raha tumhara interview? Khala ammi ne iss ki shakal dekhte hi sab se pehla sawal yehi kiya tha.

"Aap dua karain. Wahan moojod ek sahib se maine pochha tha, woh bata rahe the ke mere alawah bhi teen lady doctors interview de chuki hain aur aaj bhi mere anne ke baad shayad do aur doctors ko interview ke liye anna hai. Woh thhake howe andaz mai bistar par gir gayi thi.

"Khwa-ma-khwa dard sari mol le rahi ho tum, achi bhali tu chal rahi hai yahan tumhari job, chalo bhaiye mana ke bohat aalishaan nahi hai lekin na se haan tu hai. Phir Allah ne chaha tu yaheen pe achi job mil jaye gi.

Iss samay isse khala pe bara taras aya tha. Halan'ke dil se woh bhi yehi chahteen theen ke isse wahan job mil jaye magar bechari majboor theen ke isse zabardasti rokain, wahan janne ki mukhalifat karain.

Taqreeban pandrah (15) din pehle iss ki nazar akhbar mai diye gaye iss ishtehaar par pari thi. Inn dinon who issi udhair-ban mai masroof thi ke aisa kiya kare ke yahan se chali jaye aur khala ammi ka bharam bhi reh jaye. Ek saal pehle jab woh khala ammi ke paas Karachi se Peshawar ayi thi tu uss ne sukh ka sans liya tha. Wahan ki ghutan aur ajnabi rawaiyon se nikal kar yahan ke apnaiyat bharay mahaul mai aa kar isse hadd darja tamaniyat mehsoos howi thi. Khalo ka kai saal pehle inteqal ho chukka tha.

Khala ammi ka gharana ek middle class gharana tha. Do bari betiyon ki woh shadi kar chuki theen aur ab ghar mai Mohsin bhai aur Shehla ke bache the. Iss ne iss ghar ko apna ghar samjh liya tha. Mohsin bhai ke saath chher chhar, Shehla ke saath chhoti chhoti sharatain, woh pichhli har baat bhool chuki thi. Thori si kooshish ke baad isse ek private clinic mai job bhi mil gayi thi. Khala ammi ki mohabbat apni jagah lekin woh inn logon par boojhh nahi banna chahti thi. Isse andaza tha ke Mohsin bhai ki amdani itni zyada nahi ke woh inn pe apna barr bhi daal de. Khala ammi Shehla ki shadi aur phir Mohsin bhai ki unqareeb ho jane wali shadi ke liye jorr torr mai masroof rehti theen. Aise mai isse apni wajah se inn logon par koi bojhh dalna hargiz manzoor nahi tha. Job mil janne par iss ne sukoon ka sans liya tha.

Zindagi bohat pur-sukoon guzar rahi thi jab tak Mohsin bhai ki shadi nahi ho gayi thi. Inn ki shadi hote hi Zubiya ka sara sukh chayn jata raha. Ruby bhabi ko shuro din se iss se pata nahi kiss wajah se dushmani ho gayi thi. Shuru shuru mai tu woh inn ke rawaiye ko samjh nahi payi thi. Magar jab agay peeche kai martaba unhone kissi aur ke upar rakh kar iss par tanziya jumle kasse tu woh hairan reh gayi. Iss ki samjh mai nahi aa raha tha ke innhain iss se kis baat ki purkhaash hai. Apni taraf se iss ne inn ke saath khushgawar aur dostana ta'aluqat isstawar karne ki bohat kooshishain keen magar iss ki koi bhi kooshish bar-awar sabit na ho saki thi. Shuru shuru ke tanziya jumle baad mai barah-e-rast kaatdar guftago mai tabdeel ho gaye the.

Yahan tak tu iss ne bardasht kiya tha. Woh inn ki batoon par khamoshi ikhtiyar karke jhagre ko panapne nahi deti thi. Yehi soch kar ke woh akeli kab tak laraingi. Akhir kar khud hi himmat har jayengi magar ye iss ki khaam khayali sabit ho gayi thi. Pehle Mohsin bhai aur phir baad mai Shehla ko bhi unhone issi andaz se iss se bar-gashta kiya ke woh dekhti reh gayi. Ek hi ghar mai rehte howe Mohsin bhai sawaye salam ke jawab dene ke iss se koi baat nahi karte the. Kitna hatak-amaiz lagta tha isse inn ka rawaya. Isse nazar andaz kiye woh khala ammi aur Shehla se bilkul pehle walay style mai batain karte aur isse youn nazar andaz kar dete jaise woh wahan mojood hi nahi hai.

Abhi woh Mohsin bhai ke salook par hi afsurda ho rahi thi ke Shehla ko bhi unhone iss se bud-guman kar diya. Iss roz woh clinic se khilaf-e-mamool ghar jaldi wapis aa gayi thi. Lounge mai baithi batain karti howi bhabi aur Shehla ne isse nahi dekha tha. Andar dakhhil hote howe apna naam sunn kar woh thatak kar ruk gayi thi.

"Iss larki ke hote howe tumhari shadi kabhi bhi nahi ho sakti. Soocho zara, akhir aisi kiya baat hai ke ek bar anne ke baad koi dobara palat-ta hi nahi. Ammi bhi iss wajah se sakht pareshan hain aur abhi parsoon jo rishta Mohsin ke dost ke ghar se aaya tha, pata hai inn logon ne kiya kaha hai.

Woh Shehla ke paas baithi humdardana andaz mai keh rahi theen. Woh sar jhukaye inn ki baat sun rahi thi.

"Inn ki walda ne kaha hai ke aate waqt jiss larki ko hum ne gate par dekha tha, iss se rishte ki baat chale tu inhain bohat khushi hogi. Halan'ke tum budshakal tu nahi aur na hi woh koi haseena-e-alam. Magar aisi larkiyon ko mardon ko apni taraf mutawajah karne ke tamam gurr aate hain. Kuch aise naaz-o-adda dikhaye honge, jo mo'souf sirf gate par ek jhalak dekh ke hi ashiq ho gaye.

Woh sunn hi khari reh gayi thi. Kanoon mai sirf do lafz barr barr gunj rahe thay. "Aisi larkiyan iss ka dil chaha, woh ja ke inn ka giraybaan pakar ke poochhe "Kaisi larkiyan? Woh kis qism ki larkiyon ka zikr kar rahi theen.

Iss raat kitne ursay baad woh phir apne rab se shikwa-kuna(n) howi thi.

"Kab meri saza ki maafi hogi? Akhir kab? Tu bohat Ghafoor-o-Raheem hai. Agar banda sache dil se tauba kare too tu apne bandoo(n) ke bare se bare gunah bhi maaf kar deta hai. Aur mai jo itne barsoon se apne gunahoon ki maafi mang rahi hon. Tu tujhe mujh pe raham kyon nahi aata. Kiya mera maazi kabhi mera peechcha nahi chhore ga. Kiya kitab-e-zindagi ke woh auraaq jo meri zindagi ka sharamnaak baab hain, hawa-burd nahi ho sakte. Akhir ye zilaat aur kitni sehni hai. Aur kitni mere Allah.

Apne tamam ansoo apne andar uttar kar woh tamam-tur mamoolat-e-zindagi mai hissa le rahi thi. Magar woh jo dil ne iss ghar ko apna man-na shuru kar diya tha. Woh wali tamam kaifiyaat khatam ho gayi theen. Shehla baraye naam sirf intehayee zarorat ke waqt iss se baat kiya karti thi. Khala ammi ka rawaiya albatta pehle jaisa hi tha. Woh logon se mayl-jol ke ma'amle mai achi khassi rookhi pheeki mashhoor thi. Sirf rishte ke hawale se hi kiya waise bhi wahan koi mehmaan aata tu woh shaz-o-nadir hi kabhi drawing room ki taraf phhatakti hogi. Aise mai iss par ye ilzaam ke woh Shehla ke liye aane wale rishton ko apne liye... isse aisi baat sochte howe bhi sharam aa rahi thi. Kitna ghatiya ilzaam lagaya tha bhabi ne iss par. Iss ka kayee barr dil chaha ke woh Shehla ko samjhaye ke "pyari Shehla! Tum udaas aur na-umeed mutt ho. Jab tumhare naseeb khulainge tu harr rukawat aap hi aap durr ho jaye gi aur zarori tu nahi ke har anne wale tumhe na-pasand kar dete hon, ho sakta hai ke abhi woh durust waqt hi nahi aya ho jo Allah ne tumhari shadi ke liye muqarar kar rakha hai.

Magar woh ek dum itni durr chali gayi thi ke woh chahte howe bhi iss se baat nahi kar payi thi.

Iss roz woh clinic se wapis aa rahi thi jab rishte ke liye anne walo(n) se iss ki gate par mud-bhair howi thi. Aur siwaye ek rasmi se salam ke woh tu wahan bilkul bhi nahi ruki thi. Magar bhabi ne jo budgumani aur shak ka beech boya tha, woh ahista ahista phulna phoolna shuru ho gaya tha. Woh chup chap sab kuch dekh rahi thi magar kissi intehayi faisle ke barre mai iss ne iss waqt tak kuch nahi socha tha jab tak ke bhabi ne iss par Mohsin bhai ke hawale se intehayi ghatiya ilzaam nahi lagaya tha. Uss roz sirf itna hi tu howa tha ke toofani barish mai isse apna ghar wapis pohanchna mushkil lag raha tha aur iss ne Mohsin bhai ko office phone kar ke keh diya tha ke wapsi mai isse bhi pick kar layn. Isse aur Mohsin bhai ko ek saath aata dekh kar bhabi ne aasman sar pe uthha liya tha. Unn ke kamre se cheekhne chilane ki awazain itni saaf sunaye de rahi theen ke woh apne kamre mai baithi ba-asani sab kuch sun rahi thi.

"Sharam aani chahiye tumhe itne wahiyat ilzaam lagate howe. Mohsin bhai chilaaye tu woh jawaban unn se bhi taiz awaz mai chilayeen.

"Sharam aap ko aani chahiye jo ghar mai pakbaaz aur hayadar biwi ke hote howe aisi budchulan larkiyon ke saath gulchhuray urrate hain. Woh sari raat iss zilaat par be awaaz roti rahi thi. Isse kiya karna tha, woh bilkul bhi nahi janti thi magar ye tu tay tha ke ab isse yahan nahi rehna tha. Aglay roz khala ammi khud se nazrain churati howi mazeed sharminda kar gayeen theen. Woh sara din soochti rahi thi. Kabhi sochti kissi working women's hostel mai rehna shuru karde. Kabhi sochti kaheen paying guest ke tor pe rehne lage, magar koi baat iss ke dil ko nahi lag rahi thi. Issi shaher mai rehte howe hostel wagaira mai rehna bara na-mumkin kaam tha. Khala ammi ko apne milne milane waloon ke samne kitni sharmindagi hoti jin se woh bar-mala kaha karti theen. "Zubiya tu ab mere ghar se rukhsat hogi. Mah Talat ki beti hai ye aur uss ke ahsanaat tu mai marte dum tak nahi uttar sakti. Aur ab uss Mah Talat ki ladli beti hostel mai rehti tu log dus tarah ki batain na banate. Woh jitna soch rahi thi, dimagh itna hi ulajhta ja raha tha. Magar ussi roz raat mai akhbar dekhte howe jab uss ki nazar uss ishtehaar pe pari tu aisa laga jaise isske masle ka hal nikal aya ho. Iss ne agle hi roz apni CV post kardi thi aur baytabi se jawab ka intezar karna shuru kar diya tha. Isse wahan se call anne ki kafi umeed thi. Itni durr aftaadah aur taraqi pazeer basti mai kissi doctor aur woh bhi lady doctor ka jana khassa mushkil kaam tha. Ishtayhar mai di gayi targheebaat bhi ghalban lady doctors ko kashish dene ke liye theen.

Wahan se interview ki call ayi, tab iss ne khala ammi ko iss ke babat sab kuch bataya tha. Unhone uppari dil se danta dapta tha magar saaf lag raha tha ke woh iss ke chale janne ka sun kar khush ho gayi hain. Shayad aaj kal mai woh khud bhi iss se yehi kehne wali theen magar kehne ka moo nahi bun par raha tha. Kaise keh deteen isse ke wapis apne ghar laut jao. Woh jiss ki maa ne inn par be shumar ahsanaat kar rakhe the isse apne ghar se kyonkar nikalne ka hukm suna deteen.

Thank you so much for putting so much efforts, 🤗beautiful start, little tough for me but I am still enjoying it.. one suggestion, please put chapter 1,2 or any number or something, just so that we all can refer to them.. btw what's your name? Thanks again,looking forward to this story

Wow thank u soo much

Originally posted by: fanraya

Thank you so much for putting so much efforts, beautiful start, little tough for me but I am still enjoying it.. one suggestion, please put chapter 1,2 or any number or something, just so that we all can refer to them.. btw what's your name? Thanks again,looking forward to this story

It is a huge undertaking. I guess I realize it now. Even with my 80-words-per-min typing speed, it's taking up a lot of time. But I am glad you guys are finally enjoying this amazing Farhat Ishtiaq classic like I did.🤗

That's a good suggestion.

You can call me Jiya.

Originally posted by: Briyanikidaig

Wow thank u soo much

Now ppl who cannot read Urdu ,it's easier for them to read here

Thanks a lot for ur effort octa🤗

No probs.

OMG.. well done.. even I would love to help you in writing some part of this novel.. I know Urdu.. 😊

Thank you very much @Jiya .

Thanks so much. Book marking to read later.