Govinda ko akela chhod do: Rajan

Woh meri shaadi mein aaya tha

India TV: India TV ne jo khulasa kiya hai, jisme Govinda ko bhi dikhaya gaya. Govinda hi nahi saari industry inke dabaav mein bahar videsh jaati thi. Dawood se, Abu Salem se, Chota Rajan se sampark mein thi.

Rajan: Nahi-nahi. Us waqt dabaav wali koi baat nahi thi. Ye aaya tha idhar, ye us waqt programme mein aagaya.

India TV: To kya aap yeh keh rahe hain ki unhe kisi tarah ka dabaav nahi diya jaata tha? Woh apni marzi se aate thay.

Rajan: Haan woh apni marzi se aaya tha.

India TV: Lekin R Sahab, dekha gaya hai ki 1990 mein Govinda, Dawood se milkar aaye to woh industry mein apna dabdabaa banana chah rahe the. Yeh kehte the ki mere sampark upar tak hain. Is baare mein koi jaankari hai?

Rajan: Darpok insaan hai yeh. Yeh kya itni baat karega. Mere ko nahi lagta ki aisi koi baat hai. Us waqt kaafi log aate thay. Koi shopping karne aata tha, koi idhar aata tha, program hote thay.

'They were never forced to come to Dubai'

India TV: Govinda ne kaha ki tab hum ko bandook ki nok par le jaya jata tha. Airport par agwa kar liya jata tha, zabardasti hume wahan ja kar hasna padta tha. Kya yeh baat sach hai?

Rajan: Nahi-nahi yeh sahi nahi hai ki bandook ki nok par le jate thay. Yeh koi program me aa jate thay. Dubai paradise lagati thi us samay. Koi show ke liye aata tha to koi paise lekar aise hi aa jata tha. 1993 ke baad koi kuch kehta to gunhegaar tha.

Aisa mujhe nahi lagta ki iska koi bahut bada gunaah hai. Abhi kuch bhi bol raha hai. Usey samajh nahi aa raha kya bolna hai. Lekin aisi koi baat nahi hai. Nahi us ka itna bada gunaah hai.

India TV: Desh se bahar rehte huey bhi aap khud ko deshbhakt kahte hain.

Rajan: Mujhe yeh certificate nahin dena hai ki main deshbhakt hoon ya nahin. Yeh har insaan ko hona chahiye. Jo ban padta hai hum karte hain, lekin humein kya mila. Teen sau logon ki hatya. Police ne maara hai unko.

Bhai hum ne us Nepal wale Baig ko kyon maara? ISI agent tha woh. Kisi ne bola ki yeh rashtra ke liye, humare liye bahut bada dhokha hai.

Yahaan se sab militant aate hai, us ko maar daala.

Dawood's chehra

India TV: Kya Dawood ne plastic surgery ke jariye apna chehra poora change kara liya hai?

Rajan: Chhodo in sab baaton ko. Iske andar mat jaao. Aisa kuch nahi hai.

India TV: Toh kya plastic surgery karwai hai Dawood ne?

Rajan: Aisa kuch nahin hai. Thoda changes hai, lekin yeh sab baat mat karo. Aap agar desh premi hain to in baaton ko thoda samajho.

India TV: Ab aap Bharat sarkaar se kya kehna chahenge? Kya samarpan karne par vichaar kar rahe hain?

Rajan: Main koi samarpan karna nahi chahta. Mujhse jo ban padega main karoonga. Har insaan ko apne apne level par desh ki sewa karni chahiye. Humara system kharaab hai. Hum us mein to kuch nahi kar sakte.

Message to Dawood

India TV: Dawood tak koi sandesh pahunchana chahenge?

Rajan: Koi message nahin hai. Koi aisa kaam mat karo. Govinda ke liye mera view kiya hai, agar aap interview dene wale ho to yeh mat karo, aap samajho meri baat ko.

India TV: Dawood ko koi sandesh dena chahengey?

Rajan: Kya sandesh dena hai us desh drohi ko? Jo paap usne kiya hai, uska anjaam toh milega usko.

India TV: Dawood is samay kahaan hai. Kya iski jaankari hai aapko ?

Rajan: Mere bhai, mere bhaiya, yeh kaam mat karo yeh open kar ke kaam mat bigaado.

He came on public demand

India TV: Govinda kitni baar Dubai gaye honge. Govinda ke mutabik woh 2-3 bar dubai gaye. Kitni sachchai hai in baaton mein?

Rajan: Main jab tha to mere khayaal se 2-3 baar hi aaya tha. Meri shaadi ke time aaya, ek-do baar aur aaya.

India TV: Toh kya revolver ki nok par bulaya ?

Rajan: Wahan to koi revolver laga hi nahi sakta. Nobody can do like this, you know.

India TV: To yeh baat bilkul galat hai ki usey kisi pressure ke tahat bulaya gaya tha wahaan par?

Rajan: Jitna ho sake bechaare ko cover karo. Bhola hai, isko samajh mein nahi aa raha ki kya karne ka hai. Itna bada star hai, India ki public ko ji bhar kar hasaaya hai. Thoda sa woh karna chahiye na aap logon ko.

India TV: To aap sahaanubhuti rakhte hain Govinda ke saath.

I'm crazy about Govinda

Rajan: Of course, he is a big star and I am also crazy about him.

India TV: Lekin Govinda Dawood ke saath dikh rahe hai. Dawood ke upar do darzon se jyaada case hain. Govinda uske saath khade ho kar cigarate pee raha hai, muskura raha hai — koi deshbhakat aisa kar sakta hai?

Rajan: Dekhiye woh ek actor hai...public figure hai...you understand me...koi bhi usse milna chahe to mil sakta hai na...aap ko usey us nazar se nahi dekhna chahiye...dekho kuch bhi ho yaar...itne logon ko hasaaya hai usne...

India TV: To aap yeh maante hain ki Govinda apni marzi se wahaan gaya, aur logo ko entertain kiya?

Rajan: Haan apni marzi se aaya, public demand par aaya.

India TV: Aapne hum se baat ki, hume phone kiya, main aapka tahe dil se shukriya ada karta hun.

Rajan: Aapki taareef suni hai aur sahab ne bola hai ki yeh deshbhakt hai, aur yeh acha insaan hai, matlab young ladka hai, maine bola ki chalo main baat karoonga. Hum koi Hindu ya Muslim nahi, Hindustani hain, hum logon ko mil kar kuch kaam karna chahiye.

Ye galat log ki wajah se humare desh ka naam badnaam hai, Musalmaan logon ka naam badnaam hai, isey hum ko clear karna chahiye. Milkar kaam karenge to kuch hoga na otherwise nahi hoga. Bole ki deshbhakat hai, kya mila hai humko, police ne humare kai logon ko maar diya, what is that?

What is the system? Woh bechaara jo military intelligence ka officer tha usne aapna revolver de diya. Militant log andar ghuste hain, us bechare ka saman gaya to usey punish kar diya, us ka promotion ruka hai to this is the system.

Rajan: Aap interview chapo ge ya nahi? Aap agar chahte ho — deshbhakt ho — to Govinda ko bata dena ki mera interview ye tha. Baaki aur kuch nahi karna, kyonki unnecessary batein hoti hai. Hume baatein nahi karni, kuch karke dikhana hai.