Bachpan ki yaadein
Ae dil chal chalen us samay mein fir se
Jab socha karte they hum sirf dil se
Kaun sachha kaun jhootha yeh samajh na thi
Jab bina baat muskurahat humesha chehre pe rehti thi
Jab phoolon ki khushboo ka khoobsurat ehsaas tha
Titliyon ke peeche bhaagna humare liye khaas tha
Pedon par jhoole humare dil ko bhaate the
Doston se jhagde pal bhar mein bhool jaate the
Panchhiyon ki udaan hume mile yehi thi chaahat
Maa ke aanchal tale hi milti thi raahat
Baarish mein kaagaz ki kashtiyan khoob chalayi
Ab woh khushiyan ho gayi hain humse parayi
Ab na din raat ka fark raha na rahe woh haalat
Chhoti chhoti baat pe bikhar jaate dilon ke jazbaat
Ab samay nahi dekhen kabhi un phoolon ya titliyon ko
Darr hai ki unke khayal ko bhi samay na de paayen toh
Bhaag rahen hain hum ek anjani daud mein
Kaun apna kaun paraya kaun milega kis mod pe
Jin pedon par hote the jhoole aaj wo veeran pade
Sapnon ki udaan mein hum hain akele khade
Laut sakte agar hum us samay mein fir se
Apnon ko apnepan ka ehsaas kaash hum de paate
Zindagi ka khaleepan kuch kam kar paate
Dard-e-dil ko aansuon se kuch to dho paate
Yeh ho nahi sakta dil ko hai ehsaas
Ek adhoorapan thehar gaya hai is dil ke paas
Ae dil le chal hume us bachpan mein fir se ek baar
Is chaahat mein beetenge jaane kitne aur din raat
Is dil mein chhupe armaan kya koi hai pehchaanta
Dil to fir bhi bacha hi hai koi niyam kahan hai yeh maanta
Edited by braveheartdoc - 4 years ago
comment:
p_commentcount