Posted:
Hi all,
Felt like writing down a letter from Naina to Sameer as they are not communicating directly in the show. A feeble attempt.
Mere Pyare Sameer,
Kitni ajeeb baat hai na ki hum ek sheher, ek college, ek class me hote hue bhi hume khat ke zariye baat karna pad rha hai. Lekin mujhe yeh karna pada. Jabse tum aaye ho mujhse baat hi nahi kar rhe ho. Aisi kya baat hai Sameer jo tum mujhse door jana chahte ho. Mujhe tumhare pyaar pe pura bharosa hai, isiliye main jaanti hoon ki tumhe koi baat andar hi andar khai ja rhi hai. Kya tum apni Naina ko bhi nahi bataoge? Tumhe yaad hai jab Ahmedabad se Delhi tum roothkar chale gaye the, tab tumne phone par kya kaha tha? Ki hume ek doosre ki kamzori nahi taakat banni chahiye. Us waqt me fail hue thi exams me, lekin pata hai tumhari usi baaton ne mera housla badaya tha aur me agle sare imtihaan me accha kar paayi. Fir dance competition me mera pair fisal ke me gir gayi thi. Us waqt bhi tumhare usi shabdon ne mujhe taqat di thi aur me competition jit saki. Bachpan se toh tayiji se me bas yahi sunti aa rhi hoon ke me ek manhoos hoon, janam lete hi apni maa ko kha gayi. Na shakal na surat hai mere paas aur papa ke wajah se yeh bhi sunna pada ki shayad hi mere zindagi base. Lekin fir tum aaye mere zindagi me. Mere prem. Tumhare aane se jaise mujhme saari duniya se ladne ki taqat aa gayi. Tumse pyar karna, tumse roz school me milna, tumhari pasand napsand ke baare me pata karna jaise mere liye ek junoon ban gaya. Tum mere zindagi me sabse badi khushi bankar aaye. Tumhe andaza bhi nahi ki tumhe roz dekhne se, tumse baat karne se me apne aap ko aasman ke upar paati hoon. Tumne mujhe pyar ka matlab sikhaya Sameer. Pyar karna yani sirf filmon me jana, ek dusre ko gift dena nhi balki pyar karna matlab ek dusre par khud se bhi jyada vishwas karna. Aur mujhe tumpar yahi vishwas hai. Isiliye mene aaj soch liya hai, ki jab tak tum na chaho mujhse baat karna, me tumhare paas nahi aaongi. Jab tak tum apna dard na baato tab tak tumse baat nahi karoongi. Lekin haan pyar toh yeh Naina tumse karti thi, karti hai aur humesha karti rahegi. Aur isi pyar aur vishwas ke sahare yeh zindagibhar tumhara intezaar karegi. Mujhe bhagwanji par pura bharosa hai. Aakhir unhiki sakshi se humare dosti ki shuruvat hui thi. Yadi humara pyar saccha hai toh tum khud ek din mujhse apni dil ki baat kahoge. Aur wada rha is pyar ka, tumhe jo bhi baat khaye ja rhi ho, hum dono milkar uska hal nikalenge. Aakhir Naina Sameer ki hai aur Sameer Naina ka aur humesha Naina ka rahega.
Tab tak ke liye,
Tumhari aur janmo janmo tak tumhari
Naina
