Jawaab: Ek Paigaam

Jawaab: Ek Paigaam Kisi Ke Naam

Takiyon Se Teri, Siskiyon Bhari Baatein,

Pyaar Ki Rajaai Mein Bhi, Thithurti Teri Raatein,

Kisi Khandar Mein Goonjti, Teri Rone Ki Aawaaz,

Dil Ki Sandookoon Mein Band, Tere Woh Raaz.

Door the Hum, Phir Bhi Hamein Tha Ehsaas,

Mehfil Mein The Shamil, Par Khushiyan Aayi Na Raas,

Dil Ko Phir Bhi Tha, Tum Par Poora Vishwaas,

Phir Kyu Chod Di Tumne, Zindagi Se Khushiyon Ki Aas?

Tera Dard Hamko Jana-Pehchana Lagta Hain,

Na Jane Konsa, Tumse Dil Ka Yeh Rishta Hain?

Har Chot Teri, Hamko Bhi Dard De Jati Hain,

Ashru Tumhare, Inn Ankhon Ko Bhi Nam Kar Jati Hain.

Khoon Ka Rishta Maana Nahi Hain Tumse,

Par Nahi Hain Hum, Tumhare Mehmaan,

Kadam Badhakar Apna Bana Lo,

Aur Lauta Do Hamein, Tumhari Khoyi Muskaan.