CH-4
Diary ke wahi panne...jinhe na jane kitni baar padh chuke hain Dr Ashutosh..har baar padh ke hatasha hoti hai..Apni Maa ko na dhund pane ki...Ek Vikhyat doctor ki Maa ek benaam astitvaheen zindagi kaat rahi hai iss kasbe ke kisi ghar ya galiyon mein..
Zindagi ne unhe sab kuch diya...aur badle mein unse unki maa ko chin liya...unke sanrakshak ne unhe kabhi gaud nahi liya bas sahara diya tha..
Kyu nahi gaud liya tha??..ye sawaal kayi baar kaundha tha man mein...unhe iska uttar mila par bahut bahut der ke baad...
Kashinath ussi din 80 baras ke huye they..Dhalti umr mein bhi bina kisi ki madad ke apne dainik jeevan ke karya sucharu dhang se kar lete they..
Dr Ashutosh har saal ki tarah iss saal bhi kaka ke janmdin ke liye aaye they..lucknow se 2 ghante ki doori par base iss gaon mein..Iss baar aaye to Gaon ke Logon ne bataya kaka bahut sari baatein bhulne lage hain..apna khana khud pakake khane wale kaka...Gas par chai chada ke bandh karna bhul jate they..
Koi na koi padosi kaka ki madad ke liye rehta tha...kintu poori umr bina sahare ke khud ke dam par zindagi jeene wale kaka ko ye sehan nahi ho raha tha...ghute ghute se ho gaye they udas khamosh se..
Dr Ashutosh dheere se Kaka ke paas gaye they...kaka unhe dekh ke muskuraye..."Ashutosh..Mom ke galne se pehle tum aa gaye..."
"Kaka aap to chiraag hai..."
"chirag bhi bhujte hai beta ...par Andhera mitana chirag ki niyati hai...isliye bhujne se pehle dusre chirag ko roshan karna hota hai...Ashutosh main tumhara baba kabhi nahi bana...aur tumne kabhi janne ki koshish bhi nahi ki kyu nahi bana??"
"kaka to bas kehta hoon aapko..hain to baba se bhi badh kar.."
"Ashutosh tumko maine hamesha azaad rakha tha..taki jis din tumhari Maa mujhe mile mai tumhe uske paas chod doon...par aisa huya nahi.."
Dr Ashutosh nishabd they...ek aisi dariya ho gaye they jismein kisi ne kankar fenka hai par uski lehron me halchal nahi huyi..
"Ashutosh maine hiraman ko ek diary de rakhi hai..usme sab likha hai...padh lena apna guzra hua kal ko dhund lena.main thak gaya tha dhund nahi paya"
Diary le kar wo lucknow lauthe they...ek sawaal ka jawaab mila tha..par anginat sawaal khade ho gaye they...
Diary poori padh li thi unhone ..aur kuch panktiyaan smriti patal par ankit ho gayin thi..aisi ki raat ko sapne mein drishya ban ke aane lagi thi...
Kasbe ka nari niketan..wahan Kashinath 2 saal ke ek bachche ko le kar khade hain ..bachcha bhi bahut khush hain..uske haath aur muh mein toffee hai..Saamne Dimag se asthir mahila ko do auratein kas ke pakdi huyi hai...wo "babu babu" keh kar ro rahi hai..chilla rahi hai...Rote rote wo zor laga ke chuth jati hai...daud ke kashinath se bachche ko chinne ki koshish karti hai...Bachcha bilakh bilakh ke rone lagta hai..
Piche se awaz aati hai.."kashinathji aap bachche ko le kar chale jaiye iss pagli ko hum samhaal lenge..jaiye jaldi"
Kashinath nikal jaate hai..aur awaz aati rehti hai.."Babu babu"...
Ye hi sapna unhe roz aane laga tha..
Diary ko bandh kar diya..Maa ki talash karni hai..jiska naam tak nahi maloom..kya hua tha uske saath..kyu hua tha..unke pita kaun they..sawaalon ne unhe phir se gher liya..unhe laga chiraag jalaye rakhna kitna kathin kaam hai...
Nidhi ne apne liye kheer rakhi hi nahi...Dr Ashutosh aur bharti ko khila di..usne gud ki kheer khani chor di hai..poori zindagi wo nahi kha payegi..
Ravivaar ka din Nidhi ko zarurat se jyada lamba lag raha tha...din ek aisa elastic ho gaya tha jo bas khinche hi jaa raha tha...kisi jagah par aa kar uske khinchne ki shakti kshinn(kam) nahi ho rahi thi..
Soch ek gehri kaali surang thi..jiska koi dusra sira nahi tha..wo ussi me kho gayi thi..wo sirf piyush se bhaag ke aayi thi.. piyush ki yaadon se nahi bhaag sakti wo..uske mann ke kisi kone mein 24 ghanta piyush usse baat karta hai..piyush ke pyaar ki jadein(roots) uske andar gehre tak faili huyi hai...wo jitna katthi hai wo aur badh jaati hai..inhi jadon ke saath puri umr rehna hai..ye jadein hi uska astitva ban gayi hain...
Raat ko bharti chali gayi apne ghar...
Nidhi saari raat roti rahi...sayad uss pyar par jo uske andar zinda rahega..aur wo til til marti rahegi..
Subah 9 baje prathmik chikitsa kendra mein marij aane lage they...Dr Ashutosh Adha ghanta pehle hi aa jate they ...Nidhi thik 9 baje aayi..subah aankh bahut der se khuli..rote rote subah aankh lagi thi uski ...
Dr Ashutosh ne Nidhi ko dekha aur achanak yaad aaya uska tiffin lana Bhool gaye hai...Apne dukh mein itna kho gaye ki Nidhi ko dhanyawaad bhi nahi kaha..unhe sharmindgi mehsoos huyi..
"Dr Nidhi suniye..."..
Nidhi chalte chalte ruk gayi...Dr Ashutosh ne pukara hai...
"Dhanyawaad aapka..."
"Kisliye"
"Gud ki kheer ke liye...yaqeen maniye itni swadisht kheer maine kabhi nahi khayi..Aapki tiffin kal le aaunga bhul gaya"
"Ji koi baat nahi..."
Aur wo chali gayi..
Nidhi kisi ke saamne bhi Apne andar uththe toofan ko ujagar nahi hone deti...Kaam me doobe rehna,Kam bolna aur ghar jaa kar khamoshi mein kho jana...aesehi khud ko parde mein rakhti hai
Marijon ka ilaaj karte karte shaam ho gayi...Chai saamne rakha tha...Achanak hi Baba se baat karne ki mann huyi...
"Hello Baba"
"Hello Nidhi Beta..Abhi tujhe hi yaad kar raha tha"
"Mujhe bhi aapki bahut yaad aa rahi thi.."
"Bolo beta..."
"Baba...Achcha ab phone rakhti hoon"
"Nidhi Suno Piyush tumse baat karna chahta hai...Bahut baar phone karta hai"
Nidhi ne jhat se phone kaat diya...apne toofan ko jis aawran(parde) se usne dhak ke rakha tha...wo ab uth jane wala tha...asehniya ho gaya tha sab..wo vyakul thi behad vyakul..
"Dr Ashutosh.."
Ashutosh ne palat ke dekha Nidhi thi...Awaaz kanpi huyi si thi...Ro rahi ho jaise...
"Dr Ashutosh mujhe 24 hours duty me laga dijiye..Mujhe Sunday ko bhi chutti nahi chahiye...itne ehsaan kijiye mujhpar"...
Ye keh kar wo khud ko samhaal nahi saki...pure veg(speed) se aansoo behne lage...
Ashutosh soch raha tha wo kya kahe kya kare..
"Dr Nidhi kya baat hai?."
"Mujhe Kaam mein doob jana hai Dr Ashutosh"..
Ashutosh soch raha tha Kyu doob jana hai..ye kaise pooche wo...
Edited by rabzonedge - 12 years ago
Kyunki Saas Bhi Kabhi Bahu Thi 2
