Posted:
Sameer ko maine apni chhaaya mein rakha, aaj tak maine uske Nana hoke usse maa ki tarah paala hai. Ab tumhe uska khayaal rakhna hai. Sameer meri kamzori nahi mera guroor hai.
Khayaal iss shabd mein aur iss jazbaat mein ek ajeeb si taakat hoti hai. Jab insaan kisi doosre insaan ka khayaal rakhta hai toh woh dono ke beech ek gehra rishta ban jaata hai. Aur woh rishta khoon ke rishte se bhi gehra hota hai, yun kaho jaise jazbaat ka rishta. Sameer aur Nanu ka rishta khoon ka rishta baad mein aur jazbaat ka rishta pehle tha. Agar Nanu ne Sameer ko apne pyaar aur khayaal se seencha tha, toh Sameer ne bhi unke baagh ko apni khushiyon aur apnepan se gulshan kiya tha. Sahi kaha woh unka guroor tha. Unhone uski parvarish hi aisi ki thi ki unhe uspe fakr tha. Aur aaj uss mali ko apne gulistan, apne sabse keemti phool ki fikr thi jise unhone itne pyaar se seencha tha. Unhe darr tha ki kahin mera yeh pyaara gulistan mere bina murjha na jaye. Isse jitne pyaar se maine seencha hai, kya koi aur seench payega? Kya iski bahaar aise hi barkaraar rahegi mere jaane ke baad bhi? Kya ussi tarah uss se koi jazbaat ka rishta bana payega jaisa maine banaya hai? Uski maa hi ek hai jo ab uski khooni rishtedar baaki hai, jo chahe aur koshish kare toh uske saath jazbaat ka rishta bana sakti hai...Log sahi kehte hai, har insaan ko asal se zyada soot pyaar hota hai. Nanu ko bhi apna soot pyaara tha. Woh soot unhe itna zyada aziz tha ki woh sirf uske Nanu nahi, lekin jab zaroorat padi tab uske dost, uske humdum, uske guru, uske bhai, aur yahaan tak ki uski maa bhi bane. Aakhir aise insaan ko fikr kyun na ho apne soot ki jiske saath woh itne saare rishte nibha chuke ho...
Aaj Gulzar saab ki ek ghazal yaad aa gayi:
Shaam se aankh mein nami si hai
Aaj phir aapki kami si hai
Waqt rehta nahi kahi tikakar
Iski aadat bhi aadmi si hai...
Waqt ki aadat bhi bilkul insaan jaisi hai, ya phir yun kahiye Insaan ki aadat waqt jaisi hai. Jaise guzra hua waqt wapis nahi aata waise hi guzar chuke hue log wapis nahi aate. Insaan ka kya hai woh toh nashwar hai, aaj hai kal nahi. Paisa, shohrat, daulat, inaam sab kuchh nashwar hai. Insaan ke paas uski tamaam umr shayad inme se kuchh bhi na rahe, uss se mohabbat karnewale log bhi na rahe, lekin ek chiz hai jo uske paas humesha rehti hai jo zindagi bhar uska saath nahi chhodti aur woh hai yaadein. Insaan aapka saath chhod jaaye, paisa aapka saath chhod jaaye lekin kisiki yaadein aapka daaman nahi chhodti. Insaan yaadon ke sahare apni poori zindagi beeta sakta hai. Shayad yeh yaadein insaan ki kami toh nahi poori kar sakte lekin yeh yaadein kam se kam humein himmat deti hai ki woh jaanewala humein dekh raha hai aur woh aaj bhi humara khayaal rakh raha hai. Waisa hi khayaal jaisa woh pehle rakha karte the. Jiski wajah se humara unke saath jazbaat ka rishta tha.
____________________________________________________________________________________
Sorry for an emotional post. No matter what, but experience always counts. Take a bow Kiran Kumar and Vaishnavi McDonald (My childhood fav Geeta Vishwas was back today). Even Somani's expression were good today. His expressions not for a moment were mean or cunning. They were neutral and empathetic. Who ever wrote the dialogues today, hats off to him/her. This was hands down one of the best episodes till date. I couldn't even pay attention on the technicalities which never miss my eye. Next week full of confusion, hits and misses. Let's see what CVs do, though I'm still confused with the wrapping up of rituals in a day. 😕
Fan Fictions
Kabhi Neem Neem Kabhi Shahad Shahad
