Posted:
Jagah jagah paani ruka hua tha, Prof. apni car ko bohat hi ahista se chalate huye le jaarahe thay aur saath mein dekh bhi rahe thay ke koi cheeta na urey, ghar ziyada duur na tha aur wo jaldi pohanch gaye. Darwaza Abu ji ne khola us ko dekh kar poochne lage, "kya baat hai bete bohat thake huye nazar aarahe ho?"
"Nahi Abu ji koi baat nahi, mausam hi itna dull hai ke neend aane lagi," wo Abuji ko taalte huye keh rahe thay jab ke wo bohat udaas thay; magar khayal tha ke agar Abu ji jaan jaate to bohat pareshan hotay, lekin ye nahi pata tha ke Abuji ko unki ankhoon mei udaasi aur dard saaf nazar aa jaati aur wo samajh jaate. Abuji aur koi sawaal kiye bina baat badalne lage, "Theek hai beta, tum apni neend le lo."
"Thore kaam baaqi hai Abuji, neend to nahi lekin coffee zaroor loonga," Samad muskurate huye kehne lage.
"Mein bijhwata hoon tumhari coffee, tum fresh hojao phir khane ke liye aajana," Abuji ne khayal se kaha.
"Ji behtar," keh kar wo apni coffee liye room mei chala aaya, aur hamesha ki tarah dairy khol kar beith gaya.
Lunch time ke baad bhi parhayi nahi huyi, aur phir school ka time khatam hua. Sab apne apne ghar ki taraf chale jaarahe thay, Zoha bhi ahista ahista apne ghar ki taraf jaarahi thi ke paas se ek bike taizi se guzri aur saara ganda paani uske kaproon pe aagaya.
"Good shot Daniyal!" Aamir ne hanste huye kaha, bike par beithay jab peechay mur kar Daniyal ne Zoha ko dekha, usey hairat huyi ke Zoha ki ankhoon mei aansoon nahi balke uske hontoon pe muskurahat thi. Zoha ko kabhi kisi ne gussay mei nahi dekha tha, wo har baat ko hans kar taal jaati, aur kisi ki bhi berukhi batoon ka jawab muskura kar deti, uski jagah koi aur hota to ayese batoon pe lar parta. Zoha ki isi muskurat se bhi Daniyal ko chirr thi, kyunke wo janta tha ke uski muskurahat usey apni galti aur batameezi ka ehsaas dilati.
Zoha ko jaise Daniyal ke ye harkatoon ki adat si ho gayi thi, lekin ye sooch kar pareshan thi ke Abu ji agar usse pehle ghar pohanch gaye aur us ko is halat mei dekhein to unhein afsoos hoga. Mama ke guzar jaane ke baad Abu ji is ka bohat khayal rakhte. Mama ke baad Abu ji bohat tanha hogaye thay, aur un tanhayi dekh kar Zoha bohat fikarmand hojaati, kabhi kabhi to usko apne ghar se ziyada school accha lagta. Inhi khayaloon mei wo apne ghar tak aagayi.
"Ye kya hua?" Abu ji usko dekh kar pareshaan hogaye,
"Kuch nahi, wo… paani tha na… to bas…" wo baat ko golmol kardi.
"Kitni dafa kaha hai ke mere saath hi wapis aajaana ya phir driver rakh lete hain lekin tum meri sunti kab ho," Abuji bolte rahe aur wo chupke se bathroom mei shower lene chali gayi.
Nahane ke baad bohat zor ki bhook lag rahi thi, wo plate mei khana le hi rahi thi ke door pe dastak hone lagi. Abu ji ne jab door khola to saamne Noman khara tha,
"Kya hai?" Abu ji ne dant kar kaha "roz roz chale aate ho tang karne."
"Mujhe Zoha api se baat karni hai," Noman bhi bara dheet tha.
"Wo abhi abhi school se aayi hai, aur ab tum uska demaagh khane chale aaye." Abuji use aur sunate, isse pehle wo taizi se kitchen mei chala aaya.
"Aoo Nomi, chalo tum bhi khane ke liye aajao, Zoha ne muskurakar kaha.
"Mein to kha chuka hoon aap khaiye, waise meri aaj ki candy?" wo masoomiat se pooch raha tha,
"Haan baba deti hoon na, ye lo, aur batao kya baat karni thi jo ayese mausam mei chale aaye aur wo bhi bina sweater ke?" Zoha ne poocha
"Aaj miss ne mujhe danta jabke meri koi galti nahi thi," Nomi bholepan se keh raha tha, aur Zoha bhi usko bari behan ki tarah samjha rahi thi.
"To miss ko batate,"
"Wo sun hi nahi rahi thi,"
"Chalo koi baat nahi, choti choti baatein dil pe nahi leni chahiye," wo samjha rahi thi, aur Noman hairat se usko dekh raha tha jaise uske liye ye baatein bohat bari ho. Usey dekh kar Zoha ko hansi aagayi.
"Ok chalo ab andhera ho raha hai tum apne ghar jaao,"
"Ji Api phir mei kal aaonga," Noman kal aane ka wada karke chala gaya. Zoha usko jaane ke liye na kehti to wo aur bhi beithta, Zoha ko mouhalle ke saare chote bachoon se pyaar tha, garmi ki chutiyoon mei wo har waqt unke saath khelti aur dher saari baatein karti. Aur usey Nomi se kuch ziyada lagao tha aur wo bhi Zoha ko bohat chahata tha, roz chala aata aur school ke jab tak saare qissey suna na le usey chain nahi aata. Aaj bhi uski baatoon mei Zoha ka saara kaam khatam hogaya tha, aur wo Abuji ki chai de kar wapis apne room mei chali aayi aur apne bed par beithe apni dairy kholi.
"Ji Abu ji?" Prof. ne dairy band ki aur Abu ji ki awaaz par bahar aagaye. Dinner table par Abuji aur wo saath beithay kharahe thay aur Abu ji school ke baare mei pooch rahe thay. Wo ek chotay bacchay ki tarah Abuji ko din bhar ka haal sunane laga.
****************
Saare daraktoon pe phool nazar aarahe thay, bohat khoobsorat sama tha, school choot gaya tha aur Prof. apni maqsoos jagah pe beithay charoon taraf dekh rahe thay, saamney pond ke atraaf birds chehchaha rahe thay aur upar darakt se phool Prof. ke sir pe gir rahay thay. Prof. hemesha ki tarah khayaloon mei kho gaye…
"Aamir mujhe photos leni hai, tum zara mere photos nikalo." Reema ne apne adaaon se kaha. Aamir kaise inkaar kar sakta tha wo to Reema ki har baat manta tha, Reema har ek ada se photo le rahi thi,
"Wo jagah dekho, kitni khoobsoorat hai, tum wahan bhi ek le lo," Ruby ne idea diya.
"Jagah to bohat pyaari hai lekin wahan to bhoot baresa hai," Reema ne Zoha ki taraf ishara karte huye kaha.
"Isme kya pareshaani hai, hum abhi jagah khaali kiye dete hain," Daniyal ne apne aasteen charate huye kaha.
"Chalo dekhte hain janab kitne bahadur hai," Aamir ne cherte huye kaha aur sabhi Daniyal ke peechy chal pare.
Saare group mei Daniyal ki bari ehmiyat thi, larkiyan to uski deewani thi, wo tha bhi bohat handsome ke school ki har larki ki uspar nazar thi, har koi uska dost banna pasand karta, aur kyun na karta, na sirf wo school ka sab se popular tha balke ameer ghar ka ek louta beta tha, shayed isi wajah se kaafi magroor aur ziddi bhi tha.
Zoha neechay girey phool jama karti aur apne aap par uchaal rahi thi. Zoha ne jab phool uchale to uski waqt Daniyal us jagah pe aagaya, aur saare phool uspe gir pade.
"Ye kya betameezi hai!" Daniyal ne gusse se dekhte huye kaha.
"Ye batameezi thori hai, ye to bohat pyaare phool hain," Zoha ne saadgi se jawab diya,
"Apna bachpana khatam karo aur yahan se chalti bano," Daniyal ne bari batameezi se kaha.
"Kyun? yahan to mein pehle aayi thi." Uske is sawal se Daniyal ko gussa agaya,
"Tum samajhti ho ke agar tumhara baap yahan ka prinicipal hai to tum jo chaho kar sakti ho? ye jagah tumhare baap ki nahi!" gussay mei Daniyal ke mou mei jo aaya wo kehta chale gaye.
"Shukar hai ye jagah kisi ke baap ki nahi," ye keh kar Zoha itminaan se beith gayi.
Prof. ke chehre pe ek rang sa aakar chala gaya, wo bechaini aas paas dekhne lagi.
"Maha pagal na bano, maali ne dekh liya to dant paregi," Annie ne kaha.
"Kuch nahi hoga itne saare phool hain, thoray meine le liye to ismei harj hi kya hai," Maha phooloon ka guncha banate huye kehne lagi,
"Tumhe nahi lagta phool paudoon pe hi acchay lagte hain," Annie ne kaha,
"Haan, lekin kabhi kabhi apne hatoon mei bhi acchay lagte hain," Maha ne phooloon ko sungete huye kaha.
"Thori dair mei hi murjha jaate hain,"
"Magar Annie wo thori dair mei hi hum ko kitni khushi milti hai," Maha bhi kab apni haar manti.
"Haan dekh rahi hoon tumhari khushi, ab chalo bhi!" Annie uska haath pakar kar le jaa rahi thi, aur wo "aur thoray" kehe jaarahi thi. Professor muskurakar dono ko dekh rahe thay. Acchay dost bhi ek naimat hote hain, wo phir soochne lage.
"Daniyal tumne to kaha ke ye jagah thori dair mei khali karwaloge, phir kya hua?" Reema ne tanz kiya.
"Ye kya yaar, itni jaldi haar manli?" Aamir ne bhi Reema ka saath dia.
Daniyal ko aur gussa aagaya aur wo gussay se Zoha ki taraf barne laga, lekin Anas ne usey rokh liya.
Daniyal phir wahan ruka nahi aur gusse se apni bike le kar chala gaya. Insaan jab kisi ka kuch nahi bigar sakta hai to apne aapko hi saza deta hai, Daniyal gusse mei bike chala raha tha, "Zoha jaisi larki bhi ab tumhein jawab dene lagi?" Fawaz ki baat aur saare doostoon ki hansi uske kanoon mei goonj rahi thi, wo apni soonch mein speed bharhata raha aur phir…ek pal mein uske ankhoon ke aagay andhera chah gaya.
****************** TO BE CONTINUED ******************
Health and Fitness
Tum Se Tum Tak
