Posted:
Woh pal jo bohot khaas hai...
Iss dil ke bohot paas hai...
Kehne ko toh ek lamhaa hai...
Sadiyon ke jaisa ehsaas hai...
Iss shaam ke mausam mein... Doobte sooraj ki shafaq ke saath...woh aasmaan mein phaili sooraj ki laali...apne rang se...unn safed baadlon ko apne naarangi...zaafraani rang mein rangti hai...woh aasman jo neela hai...par uss shafaq se...khudko...kiss tarah apne rang mein rang liya hai...
Kitna ajeeb rishta hai...iss shafaq ka...jo sooraj aur aasmaan ko jodta hai...
Woh sooraj...jo aasman ki sair karta hai...ek akela hai...par zindagi mein roshni bharta hai...ujaala deta hai...zindigi ko roshan karta hai...ek aisa sitaara hai...jo apni roshni se sabko roshan karta hai...
Apne rang se...apni chamak se...apne tej se...apni raftaar se...iss aasman aur zameen ko apne hone ka ehsaas deta hai...
Woh jab na ho toh zindagi mein andheraa chaa jaata hai...
Uske aane roshni ki seher hoti hai...
Uske jaane andhere ka pehar hota hai...
Woh ek sitaara ki maanind hai...jo meri zindagi mein rang bharta hai...
~~~~~~~~Mrityunjay~~~~~~~
Samndar ke kinaare...ussi shafaq ke saath...geeli ret par chalte hue...apne qadmon ke nishan...geeli ret par banate hue...
Qadmon ke nishaan jo mit'te hai...
phir aur wahi par bante hai...
ummeed abhi bhi haasil ...
shayad jo mile mujhko manzil...
Qadmon ke nishaan banate hue geeli ret par chal rahi hun taaki woh inn qadmon ko dhundte mere paas aa jaye...par mudh kar dekhti hun ...woh nishaan dhundhle padh jaate hai...
Samndar ki lehrein...jo baar baar...saahil par aati hai...aur unhe dhundhlaa kar jaati hai...woh lehrein baar baar aati hai...mere pair ko bhigo kar gudgudaa kar chali jaati hai...
Agar ek jagah ret par khade ho jaao toh ...yeh lehrein...mere hisse ki zameen...ko le jaati hai...
Mujhe kamzor karne ki koshish karti hai...jab pair ke niche se zameen khisakti hai...usska ehsaas dilaati hai...
Par phir dusre hi lamhe...ek nayi lehar aa kar...meri ussi zameen ko barabar kar deti hai...
Yeh lehrein mujhe ummeed deti hai...haar ki bhi aur jeet ki bhi...
Yeh lehrein uthti kahan hai se hai...koi nahi jaanta...
Lekin saahil par aakar...apna dam todti hai...
Kyunki samndar ka kinaara saahil unki manzil hai...unki khwaahish ki takmeel hai...
Aur mera kinaara...saahil...
~~~~~~~~Mrityunjay~~~~~~~~
meri ummeed ki gehraayi iss samndar ki gehraayi jitni hai...
Jiss tarah yeh neela samadar apni aagosh mein sab ko panaah deta hai...
Samandar ke ander bhi ek duniya hai...uski gehraayi mein...ussne sab ko sameta hua hai...tufaan aata hai...mauje uthti hai...
Bhawar bante hai...lehre uthti hai...par wahi samndar...kitnon ke jeene ka sahaara hai...yeh kashmakash...yeh hawaaon ka zor...
Usska yeh shaffaf paani...dil ki saaf hone ka bayaan deta hai...uska yeh neela paani...aankhon mein chamak deta hai...usse thandak deta hai...
Samandar ki issi gehraayi mein...kisi shell ke ander...baarish ki ek boond se Moti ka pata milta hai...woh Moti...jo gehraayi mein ek dam mehfooz hota hai...koi usse yunh dhund sakta...woh khoya hua hota hai...
Moti...safed Moti...umang paida karne waala...mohabbat ki nishaani...samnd ki aagosh mein mehfooz rehtaa hai...main hun woh Moti...jo puri tarah kisi ki panaahon mein mehfooz hun...ussmein ghul si gayi hun...
Aur mera samandar...mera muhaafiz...
~~~~~~~~Mrityunjay~~~~~~~~~~
Chalte hue...inn lehron ke saath saath...hawaa ka rukh...yeh hawaaon ka jhoka...unnka behna...mujhe apne saath yunh bahaate hue le jaana...inn thand hawaao...sard hawaayein...jo mujhe baar baar chukar jaati hai...mujhe usske hone ka ehsaas de jaati hai...mujhse kehti hai...bas mere saath beh chalo...mujhe woh wahi milega...yeh hawaayein na ho toh saans lena mushkil hai...aur josh par aaye toh tifaan paida karti hai...
Woh meri zindaagi mein...ek toofani hawaa ke bhawar jaisa tha...par uss bhawar mein jaa kar kab meri saanson ki zaroorat bana...pata hi na chala...woh toofaani hawaa ka bhawar jisse bahar kabhi nahi niklaa jaa sakta ...
~~~~~~~~Mrityunjay~~~~~~~~~~~
Samndar kinaare yunh ret par baithna usse bada pasand hai...inn chote chote...kaale paththaron par baith kar...aati hui...lehron mein zor zor se pairon se chapp chapp karna...usse bohot pasand hai...
Lekin usski ek shart hai...usske saath hona chaahiye usska humsafar...humnasheen...matlab main...
~~~~~~~~~~Tara~~~~~~~~~
Har lamhaa usske saath bhi...har lamhaa uske paas bhi...inn sitaaron...inn nazaaron ka maza jab hai...jab koi pyaara tumhaare saath ho...
Usske akelepan ka saathi...main...
Usski khaamoshi ki zubaan...main...
Usski yaadon ka nishaan...main...
Iss samndar kinaare aana...inn paththron par baithna...ek dusre paas ...ek dusre ke saath...haathon mein haath liye...khaamoshi ka daaman pakde...aankhon se baat kiye...lafzon ki zaroorat kise pade...jab nigaahein kahe dil ki zubaan...aur dil ho usska aaina...jissmein aks mera hi dikhta hai...
Uske kandhe par sar rakhe hue...yunh doobte suraj ko dekhna...mera sabse pyaara lamhaa hai...woh kabhi mujhe aur kabhi main isse dekhti hun...usski nigaahein mujhse hat'ti nahi...par bhi koshish karti hun...
Woh har dam mjhse kehtaa hai...in nazaaron mein kya rakhaa hai...jab saamne itna haseen manzar ho...toh inn lehron ki parwaah kaun kare...
Usske haaton ko yunh pakde rehna...iss shaam mein sukun deta hai...
Meri dil ko woh khushi mayassar karta hai...jo kahin bhi...kabhi bhi nahi mil sakti...
Usse chalne ke liye kaho toh kehtaa hai...
Kyun chalne ke liye kehti ho...iss khaamoshi mein bhi kitna shor hai...
Yeh khaamosh hai...par...inn lehron ka shor...inn hawaon ka shor...tumhaari dhadkanein...yeh sab mere jeene ki wajah hai...
Jo kahun raat hone waali hai...toh kehtaa hai...kyun na iss raat ke andhere mein...iss raat ki chaandni mein...chaand ko taqte raat guzar jaaye...main kahu chaand...toh kehtaa hai...haan mera chaand...woh toh tum ho na...aur main kahun...chaand woh hai...main toh chandni hun na...chaand ki roshni hai...
Woh kehta hai...jab yeh chaand apni chaandni se mere chehre par padti hai...toh mere chehre ki chamak uski aankhon mein jo sukun deti hai...woh kahin nahi...
Main Chaandni...aur woh Chaand...
~~~~~~~~~Mrityunjay~~~~~~~~~~
Khamoshiyon ne zindagi ko ghera hai...main abtak iss soch mein...iss shaam mein...geeli ret par chal rahi hun...
Phir jaa kar ret par baith gayi...
Ret ko haath mein liya...muththi jitni tight kar rahi hun...utna haath se phisal rahi hai...
Issi tarah waqt bhi haath se phislaa hai...usse mujhse door kiya hai...
Woh mujhse bichdaa hai...par judaa nahi...
Woh meri nazron ke saamne nahi...par ehsaas hai usske hone ka...woh mere qalb ki taskeen jo abtak miti nahi...aur pata deti hai...usske hone ka...
Phir bhi...abhi bhi...uski panahon mein mehfooz hun...usski chandni se ghiri hun...uski lehron mein beh rahi hun...aur iss samdar ki gehraayi jitni ummeed bhi hai...
Usske laut aane ki...
Jab yahan baithti hun...toh ussko apne paas paati hun...woh yahi hai...
Yeh khaamoshiyan...bhi ajeeb hai...khaamosh chehra...khaamosh zubaan...khaamosh nigaahein...usske jaane se...har pal mein khaamoshi hai...
Phir bhi inn khamoshiyon ne shor machaa rakha hai...
Ek baar toh laut aaye...ek baar mujhe seene se lagaa le...ek baar ...bas ek baar waapas aa jaye...dobaara yeh daaman chhotne na doongi...
Inn khaamoshiyon mein bhi cheekh cheekh kar keh raha hai...mera naam pukaar raha hai...mujhe sadaayein de raha hai...
~~~~~~~~~Tara~~~~~~~~~
Aur inhi khamosh sadaon ka peecha karte main yahan chali aati hun...usski baahon mein sukun paane...usski yaadon ko phirse jeene...usse roz yahi milne chali aati hun...uski baahon mein uske saath kuch waqt bitaane...
Aankhen band karun toh woh aa jata hai...mujhse baatein kar...mujhe himmat de...mujhe pyaar kar...aur apni yaadon se bhigo jaata hai...
Aankhen kholne par phir chala jaata hai...darr lagtaa hai...aankhen kholne se...
Par agar aaj na kholi...toh kal phir kaise aakar band karungi...aur usse milungi...
Khamoshiyon ki sadaa in kaanon mein goonjti hai...
Usske hone ehsaas ko har pal dhoondti hai...
Likha maine hai...but...Inspiration and credit goes to Archu...for this beutiful thought...
I hope u like it...
Writers Corner: Books, Stories & Poems
Anupamaa
