Sameer's Diary Excerpt- 2 (Tuitions by Naina)
Aaj toh bahot thak gaya hoon. Lagta hai shayad ek page bhi diary mein likh ke poora na kar paun. Jab se maine Headboy competition mein hissa liya hai, padhai aur Cricket ke ilawa kisi aur cheez ko waqt hi nahi de paa raha hoon. Aaj toh Munna-Pandit ko bhi thik se nahi mil paaya. Achha hua pichhle do din se Naina meri padhai mein madat kar rahi hai. Agar woh Vanasthali chali jaati toh main shayad iss Headboy competition mein sirf Cricket hi khel pata, kyunki padhai aur woh bhi saari Hindi mein mujhse hone se rahi. Ek baat toh maan ni padegi, woh behenji ho, Maniben ho ya Teacher ki chamchi ho, padhati toh woh waaqai mein bahot aasaani se hai. Mujhe humesha se lagta tha, saara din padhai ke alawa uss ladki ki koi aur interesting hobby, ya phir koi aur kaam karna usse pasand hi nahi hoga. Woh jab bhi kisi cheez ke baare mein baat karti hogi, toh sirf aur sirf padhai aur school se judi hoti hongi. Lekin ab mujhe pata chala ki woh padhai karne ke saath-saath, kisiko padhana bhi bakhoobi jaanti hai aur woh bhi woh zindagi ki roz-mara chizo ka example deke padha sakti hai. Khair yeh baat interesting ho ya na ho, mere liye toh uska yeh hunar faaydemand hai.
Gannit ho ya Biology...woh kya kehti hai Naina usse? Haan! Jeev Vigyaan, Naina ne inn complicated subjects ko mere liye samjhna bahot aasaan kar diya hai. Iss ke chalte maine bhi uss se aaj keh diya, ki agar Headboy competition mein meri jeet hui, toh woh jo kahegi main woh karunga. Aakhir iss competition mein mujhe jeetaane mein uska bhi contribution hoga. Waise woh lagti toh seedhi-saadhi hai toh mujhe nahi lagta woh mere jeet jaane par mujhse kuchh maangegi. Aur agar maangegi bhi, toh koi chhotisi cheez hi hogi. Kal hi jab main uske liye ek chhotisi Pepsi-cola le gaya tha, toh woh khush ho gayi thi. Koi aur ladki hoti toh shayad kehti ki itni chhotisi cheez laaye ho, kam-se-kam ek Gold Spot ya phir ek Amul chocolate hi le aate. Lekin Naina ne toh woh Pepsi-cola khushi-khushi leli. Aur saath hi usne mujhe apni rough-notebook bhi di, aur woh bhi kis liye? ...Uss book ke pages se main rocket bana ke uda saku iss liye...Maine yeh kabhi socha hi nahi tha ki koi ladki kore panno ka rocket udaane se rokne ke liye mujhe apni rough-notebook de degi. Woh sach mein padhai aur kitabon ki kadardaan lagti hain.
Kuchh dino pehle jab canteen mein usne Maths ka formula Swati yun 2 min mein ek gaane ki tarah suna diya, tabhi main samajh gaya ki Naina Agarwal hi woh insaan hai jo iss Headboy competition mein meri madat kar sakti hai. Lekin jab usne Vanasthali jaane ki baat mujh se ki tab maine socha ki jaise mera koi imtehaan liya ja raha hai. Ab agar woh mujhe nahi padhayegi toh iska matlab yeh saari padhai mujhe khud samajh ke karni padti ya phir uss Sanjay Tibriwal se seekhni padegi. Lekin shaayad sahi kehte hai- jo hota hai achhe ke liye hota hai. Kisi ka nuksaan , kisi ka faayda ban jaata hai. Ab Naina Vansathali nahi ja paayi, woh mere faayde ki baat hi thi. Waise main ek baat samajh nahi paaya...Naina ne jab kal mujhse aake kaha ki woh Vanasthali nahi ja rahi aur woh ab meri padhai mein madat kar sakti, maine uske chehre pe ek halki-halki si muskurahat dekhi. Aisa laga jaise woh Vanasthali na jaane aur mujhe padhane ke iraade se bahot khush hai. Yahaan tak ki usse mujhe na padha paane ka itna dukh tha ki usne Swati ke haatho mere liye kuchh Maths ke important formulas bhi bheje the. Khair maine toh woh formulas dekhe nahi, aur ab mujhe dekhne ki zaroorat bhi nahi, Naina jo hai mujhe yeh saare formulas khud samjhane ke liye!
---------------------------------------------------------------------------------------------------------------P.S: Unfortunately I didn't get time to watch the Tuition episodes again to write the sequences in proper chronological order. There are chances I might have mixed up the order of the sequences. Apologies for that!
Edited by KashafZaroon30 - 6 years ago
comment:
p_commentcount