Originally posted by: Debipriya
Dear Friends,
Now I am posting a scene from Shri Krishna which is very close to my heart. When I watched it for the first time, I was so Surprised by the WISDOM?It is the scene where Nand comes to meet Krishna after Kans-Vadh.
Nand's Last Meeting with Krishna (after Kans vadh)
(As Nand enters the room of Krishna and Balaram, they proceed towards him with folded hands and attempt to touch his feet. At this, Nand starts crying. Then Krishna starts to console him.)
Krishna- Baba! Yeh kya kar rahe hai aap Baba? Yeh kya kar rahe hai aap?
Nand- Main kya karun Kanha? Main kya karun? Mai bahut rok raha hoon, lekin yeh aansoo mere bus me nahi hai. Maine to?maine to socha bhi tha ki jaate waqt tujhse nahi milunga. Wo bhi na ho saka. Mere pair apne aap tere kaksh ki ore aa gaye. Aur tujhe dekh kar mann me bus aisa khayal aaya ki phut phut kar rone ki ichha hoti hai. Andar se lajja bhi aati hai ki paraaya Putra se itna moh karne ka kya adhikaar hai mujhe? Parantu dil hai ki meri koi baat sunta hi nahi. Baar baar ek hi baat keh raha hai ki Kanha se bichad kar kaise jeoge Nand Baba, kaise jeoge? Isse to achha...isse to achha hai ki yehi uske saamne apne pran chod do. Tu hi bata mai kya karun? Kya uttar doon is pagle dil ko?
Krishna- Paagal ko kabhi koi uttar deta hai Baba? Haan Baba, tumhare dil sach me paagal ho gaya hai. Jo tumhe yeh kehta hai ki mai paraya Putra hoon, Baba wo paagal nahi to aur kya hai? Jin baalako ko unki Maata-Pita kisi kaaran se chod dete hai, aur jo un baalako ko apne seene se lagakar unke paalan-poshan karte hai, Baba, vaastav me wohi unke asli Maata-Pita hai. Baba, kaun kehta hai ki tum mere Pita nahi ho? Kaun kehta hai Baba? Baba, wohi to asli Pita hai, wohi to asli Maata hai, jo kisi asamarth Maata-Pita ki tyage hue Putra ko apne Putra ki samaan paalan-poshan karte hain. Baba, bachpan se na to humne Maata ko dekha hai, aur na Pita ko. Keval Yashoda maiya ko Maata, aur Nand Baba ko Pita samajhte hue bade hue hai, Baba. Aap dono ki mamta aur sneh ki kaaran hi hum dono aaj jeevit bache hain, Baba. Aur aaj itna bade ho gaye hai. Aur yedi is avaastha me bhi aapka dil aap se yeh kehta hai Baba, ki hum aapke paraaye Putra hai, to wo dil paagal hai Baba. Mat suno aisi dil ki baat, mat suno Baba.
Nand- (With tears in his eyes) To phir kiski baat sunu mai? Kiski baat sunu?
Krishna- (Wiping Nand's tears) Baba, (He makes Nand sit down and consoles him). Baba, Ao Baba, aao. Apni chitta ko shaant karo Baba aur dheeraj se meri baat suno. Jab putra bada ho jata hai to kya uske mata-pita usse apne kaam karne ke liye usse apne se door nahi bhejte? Kabhi byapaar ke liye, kabhi desh-sewa ke liye, to kabhi maanav aur samaaj ki sewa ke liye bhejte hai. Bhejte hai na? Mai bhi to Yashoda maiya se aate samay yehi kehke aaya tha Baba, ki apni kartavyo ki purti ke liye mai chahe kitni door kyun na chala jaun, parantu jahan bhi rahunga, sada tera hi putra kehlaunga. Aur apni kartavyo ki poori hone par phir lautke tere paas aunga. Baba, Kans ki sanhaar karke maine apni jeevan ki ek hi pramukh kartavyo ko poora kiya hai. Abhi to mujhe aise bahut se kartavyo ko poora karna hai Baba. Maiya-Baba ki laad pyar aur mamta ki chhaya se nikalkar mai ek lambe kathor kartavya path par chal pada hoon Baba. To ab mera raasta na roko, mera raasta na roko Baba. Mujhe bahut door jana hai, bahut door jana hai Baba.
Nand- Kanha, tujhe samajhna bahut kathin hai re. Kabhi tu bilkul apna lagta hai, bada nikat lagta hai, aur kabhi itni door chala jaata hai, jaise apna koi nahi.
Krishna- Yehi Satya hai Baba. Mai apna bhi hoon aur nikat bhi, parantu mai door bhi itna hoon ki mai kisika nahi. Vaastav me yehi Gyan ka adhaar hai Baba, ki yahan koi kisika nahi. Na koi kisika Pita hai, na koi kisika Putra. Yeh rishte naate, yeh mamta, yeh moh ki bandhan, yeh shatruta ke bandhan, yeh sab Maya ki 'drishti bhram' hai Baba, sab Maya ki 'drishti bhram' hai. Apne poorva janmo ke karmo ke anusaar har janm me naye naye rishte, naye naye naate bante aur bigadte rehte hai. Koi rishta, koi naata sadaa ke liye nahi rehte, har janm me yeh badalte rehte hai. Sada keval rehte hai Satya aur Bhagwan. Is liye Bhagwan ka ek naam 'Satya Narayan' bhi hai Baba.
Nand- Itna Gyan kahan se mila hai tumjhe? Haan? Kuch log kehte hai ki tu Bhagwan hai. Sach sach bata, tu Bhagwan hai?
Krishna- Haan Baba, main Bhagwan bhi hoon.
Nand-(astonished...) Bhagwan bhi ? Kya matlab ?
Krishna- Baba, shaastra kehta hai ki har jeev ki aatma me Bhagwan ka ek pratibimb hota hai. To mai bhi Bhagwan hoon, isi prakaar, aap bhi Bhagwan hai. Arthat, samast jadh-chetan praniyo ke antar me Bhagwan hota hai. Phir chahe wo vriksh ho, nadi ho, pathhar ho ya Baba phir aap ke bail. Sabhi Bhagwan ke roop hai.
Nand- Haan? To phir pathhar pathhar kyun dikhta hai? Vriksh vriksh kyun dikhta hai? Bhagwan kyun nahi dikhta?
Krishna- Kyunki aap Maya ki chakshuyo se unhe dekhte hai, Baba. Uske liye apni chitta ki saari vrittiyo ko rok kar Gyan athva Bhakti ki drishti se dekhoge to Baba pathhar bhi Bhagwan dikhayi dega, vriksh bhi Bhagwan dikhayi dega. Isi prakaar jab aankho se Maya ka parda hat jayega to is baat ka Gyan hoga ki alag alag paatro ke alag alag roop dharke Bhagwan Swayam hi yeh leela kar rahe hai. Swayam hi Pita hai, Swayam hi Putra. Swayam hi Mitra hai aur Swayam hi Shatru, Baba. Jab is 'charam Satya' ki anubhuti ho jaati hai, to praani dukh aur sukh ki seemayo se aage nikal jata hai. Phir usse yeh milna, yeh bichadna, yeh viyog, yeh mitrataa, yeh shatrutaa, sab kuch ek khel sa lagne lagta hai. Pita hone ki naate Baba, yeh saari baate aapko mujhe samjhaani chahiye, ta ki aapka putra bhaavnaayo ki daldal se nikal kar ek kathor kartavya path par aage badh sake. Yeh ek Pita ka kartavya hai Baba. Anyatha yadi aap hi itna bhaavuk jo jayenge, to aapki yeh bhaavukta aapki putra ki path par rukaavat ban kar baar baar uska raasta rokegi, Baba, uska raasta rokegi.
Nand- Kanha, aaj mujhe aisa lag raha hai, jaise tu mera Putra nahi, mera Guru hai. Aaj tune?aaj tune mujhe Pita ka Dharma ka Gyan kara diya. To le, aaj tera Baba vachan deta hai ki ab se na wo kabhi royega, aur na kabhi tere raaste me aayega. Tere Baba ka yeh aashirwad hai, aur Bhagwan se yeh prarthana bhi hai ki tera 'Kartavya Path' hi tera 'Keerti Path' ho jaye.
(Then Krishna and Balaram both embrace Nand and touch his feet.)
Nand- (Blessings them) Tum dono sada vijayi raho.
(After that he goes out of the room.)
Now the song which comes just after this scene, describing the mental state of Nand at that moment.
Nand returning to Gokul from Mathura
(after meeting Krishna for the last time)
Mann hai byakul, nain se jal bhi(?);
Kaisi kathin vidayi ho;
Suraj ke sang, doob raha mann;
Kaisi bela aayi ho;
Suraj ke sang, doob raha mann;
Kaisi bela aayi ho.
Krishna ki baaten, Krishna ki leela;
Jaaye na bisraayi ho;
Baba, Baba, ki wohi pratidhwani,
Prati pal pade sunaayi ho;
Baba, Baba, ki wohi pratidhwani,
Prati pal pade sunaayi ho.
Kadve vish se ?(?) bhi badhkar;
Kadvi yeh sachhai ho;
Jis ke moh me sab kuchh bhula;
Thi wohi vastu paraayi ho;
Jis ke moh me sab kuchh bhula;
Thi wohi vastu paraayi ho.
Jai Shri Krishna. Jai Shri Ram.
comment:
p_commentcount