Posted:
Hello forumwasis 😃
I'm here with my first poem which I'm dedicating to Saru who encouraged me to write something on this😛
I hope you find it worth reading... Saru hope you like it dear😃🤗
Here it goes...
Aao sunaaun tumhe apni main kahani
Badi hi dukhbhari hai doston suno meri zubaani
Ek din mein kya se kya ho gaya
Kya tha main aur ab kya ban gaya
Maze se guzar rahi thi meri bhi zindagi
Har aane wali ladki ki nazar thi mujhpar padti
Mere jaisa na tha koi doosra wahan
Le aayi meri kismat mujhe jaane kahan
Aayi ek khubsoorat pari mere nagar mein
Dekh use dil chaha kaash chale hum saath ek dagar mein
Chahti thi woh koi aur jeete mujhe uske liye
Dil tha dhadakta uska jiske liye
Ek sajeele rajkumar ne chalaya apna jaadu
Khushi se mera bhi dil ho gaya bekaabu
Main khushi se foola nahi samaya
Jab main us pari ki baahon mein aaya
Usne rakha mujhe apne dil ke paas
Main... haanji main hi tha uske liye sabse khaas
Aap ka to pata nahi par usne mujhe jannat dikhayi
Mere akelepan se mujhe mil gayi thi rihayee
Kya pata tha yeh jannat hogi do pal ki mehmaan
Ban jaaunga main fir sirf ek saamaan
Dil uska kya toota pahaad mujhpar gir gaya
Dukh ke andhere mein mera bhi dil ghir gaya
Bhala ho uski saheli ka jo woh mujhe saath le gayi
Socha dekh lunga saath unke main bhi koi jagah nayi
Par woh to mujhe bhool chali jaise mera koi wajood nahi
Laga mujhe uska meri taraf dekhne ka koi mood nahi
Bhala ho us insaan ka jisne use yaad dilaya
Par uske liye auron ke vichaar main kuchh samajh na paaya
Khair chhodo uske baare mein main kyun bataaun
Meri kahani mein main use hero kyun banaaun
Kahan tha main... haan us pari ke ghar mein
Huhh...aakhir pahunch hi gaya main uske nagar mein
Kya pata tha mujhe hoga mera aisa bura haal
Noche jayenge alag alag tareeke se mere baal
Koi mujhe gale lagata to koi thappad lagata
Koi paas bulata to koi door bhagata
Ghar aaye mehmaan ke saath aise koi karta hai
Koi mujhe dekhke rota hai to koi hasta hai
Kisi ne na poochha mujh bechare ka haal
Mera rang sab udh gaya badal gayi meri chaal
Socha tha kya aur kya ho gaya
Pyar ki ummeed mein mera sab kuchh kho gaya
Isse to main wahan par hi achha tha
Main akela hi sahi mera akelapan to sachha tha
Ab to hai bas us din ka intezaar
Us pari ke dil mein jagah bana le fir wo rajkumar
Shayad meri bhi zindagi kuchh badal jaye
Hey Bhagwan meri dua in dono ko lag jaye
Kaash wo rajkumar uske liye ek aur teddy le aaye
Mujhe bhi apna kehne ko koi dost mil jaye
Tab tak rahega mujhe us din ka intezaar
Sehna hi padega uske badalte moods ka vaar
Karo dua mere liye bhi mere yaaron
Aap sab to mujhe yaad karo yu na mujhe bisaaro
The end... sorry it's too long... hope you enjoyed😃
comment:
p_commentcount