Shayri ( My Collection)

shareShare facebook twitter
Posted: 9 years ago
Kab Uska Visaal Chahiye Tha?
Bas Ik Khayal Chahiye Tha
Kab Dil Ko Jawab Se Gharaz Thi?
Honton Ko Sawaal Chahiye Tha
Ek Chehra Saada Tha Jo Hum Ko
Be Misl-O-Misaal Chahiye Tha
Ik Qarb Main Zaat-O-Zindagi Hain
Mumkin Ko Muhaal Chahiye Tha
Main Kya Hoon Bas Ik Malaal-E-Maazi
Us Shakhs Ko Haal Chahiye Tha
Hum Tum Jo Bichar Gaye Hain Hum Ko
Kuch Din To Malaal Chahiye Tha...!!!
Edited by AttitudePrince - 9 years ago
Posted: 9 years ago
Duniya Ne Ham Pe Jab Koi Ilzaam Rakh Diya 
Hamnay Muqaabil Uskay Tera Naam Rakh Diya 
Ik Khaas Had Pe Aagayi Jab Be-Rukhi Teri 
Naam Uska Hamnay Gardish-E-Ayyaam Rakh Diya 
Main Larkhara Raha Hoon Tujhay Dekh Dekh Kar 
Tu Ne To Meray Samnay Ik Jaam Rakh Diya 
Kitna Sitam Zareef Hai Wo Saahib-E-Jamaal 
Usnay Diya Jala Ke Lab-E-Baam Rakh Diya...!!!
Edited by Alone_Prince - 9 years ago
Posted: 9 years ago
Gehrayi Alag, Lehron Ka Phelao Alag Hai 
Sahil Se Magar Maujon Ka Takraao Alag Hai 
Likkhay Hue Har Lafz Ki Taseer Se Barh Kar 
Bolay Hue Alfaaz Ka Pathraao Alag Hai 
Jo Khud Ko Sametay Hue Saalim Hai Bazahir 
Us Tootay Hue Shakhs Ka Bikhraao Alag Hai 
Ho Jis Main Samandar Ka Safar, Us Ke Muqabil 
Lagti Hai Kinaray Se Jo, Wo Naao Alag Hai 
Ye Jaal Alag Hath Main Bunti Hain Lakeerein 
Qismat Ke Sitaaron Ka Uljhaao Alag Hai...!!!
Posted: 9 years ago
Goshay Badal Badal Ke Har Ek Raat Kaat Di 
Kacchay Makaan Main Ab Ke Bhi Barsat Kaat Di 
Wo Sar Bhi Kaat Deta To Hota Na Kuch Malaal 
Afsoos Ye Hai Usnay Meri Baat Kaat Di 
Halan Ke Hum Milay Thay Badi Muddaton Ke Baad 
Auqaat Ki Kami Ne Mulaqaat Kaat Di 
Jab Bhi Hamein Chiraagh Mayassar Na Aa Saka 
Sooraj Ke Zikr Se Shab-E-Zulmaat Kaat Di 
Dil Bhi Lahu Luhaan Hai, Ankhein Bhi Hain Udaas 
Shayad An'a Ne Shehrag-E-Jazbat Kaat Di 
Jadugari Ka Khel Adhura Hi Reh Gaya 
Darvesh Ne Shabeeh E Tilismaat Kaat Di 
Thandi Hawayein, Mehki Fiza, Naram Chandni 
Shab To Bas Ek Thi Jo Teray Sath Kaat Di...!!!
Posted: 9 years ago
Meri Rooh Jaisay Kuchal Gaya 
Koi Shakhs Aisay Badal Gaya 
Ye Kis Ka Harf-E-Dua Raha 
Ke Main Girtay Girtay Sambhal Gaya 
Teri Yad Jab Anay Lagi 
Mera Dard Jaisay Behal Gaya 
Meri Qismaton Ka Qaafila 
Kisi Aur Jaanib Nikal Gaya 
Tumhein Dekhtay Hain Besabab 
Koi Khwab Mera Machal Gaya 
Mera Pattharon Sa Ghuroor Tha 
Magar Teray Aagay Pighal Gaya...!!!
Posted: 9 years ago
Hum Nazuk Nazuk Dil Walay 
Bas Aisay Hi To Hotay Hain 
Kabhi Hanstay Hain Kabhi Rotay Hain 
Kabhi Dil Main Khwab Pirotay Hain 
Kabhi Mehfil Mehfil Phirtay Hain 
Kabhi Zaat Main Tanha Hotay Hain 
Kabhi Chup Ki Mohar Sajatay Hain 
Kabhi Geet Labon Par Latay Hain 
Kabhi Sab Ka Dil Behlatay Hain 
Kabhi Khud Hi Tanha Hotay Hain 
Kabhi Shab Bhar Jaga Kartay Hain 
Kabhi Lambi Taan Ke Sotay Hain 
Hum Nazuk Nazuk Dil Walay 
Bas Aisay Hi To Hotay Hain...!!!
Posted: 9 years ago
Mohabbat Dushman-E-Jan Bhi 
Mohabbat Yaar Hoti Hai 
Mohabbat Jeet Bhi Shayad 
Mohabbat Haar Hoti Hai 
Kabhi Aisa Bhi Hota Hai 
Mohabbat Paas Dikhti Hai 
Magar Us Paar Hoti Hai...!!!
Posted: 9 years ago
Ap Ki Baat Man Li Hamnay 
Apnay Hathon Hi Jan Li Hamnay 
Aj Se Bhool Jayengay Khud Ko 
Aj Se Ye Bhi Than Li Hamnay 
Ronaqon Se Bhara Hua Tha Nagar 
Teray Gham Ki Dukan Li Hamnay 
Aa Giray Dhap Se Sakht Mitti Par 
Bin Parro'n Ke Uraan Li Hamnay 
Khud Farebi Bhi Ho Gayi Mushkil 
Jab Haqeeqat Hi Jan Li Hamnay...!!!

Related Topics

No Related topics found

Topic Info

14 Participants 943 Replies 53083Views

Topic started by .Hussain.

Last replied by Nehageet.

loader
loader
up-open TOP